राष्ट्रपतीपदाची निवडणूक 18 जुलैला होणार, 21 जुलैला देश पाहणार नव्या राष्ट्रपतींचा चेहरा

राष्ट्रपती निवडणूक 2022, 9 जून 2022: निवडणूक आयोगाने राष्ट्रपती निवडणुकीची तारीख जाहीर केलीय. 18 जुलै रोजी राष्ट्रपतीपदाची निवडणूक होणार असून 21 जुलै रोजी देशाला नवा राष्ट्रपती मिळणार आहे. 29 जून ही उमेदवारी अर्ज भरण्याची शेवटची तारीख असंल.

गुरुवारी पत्रकार परिषदेत मुख्य निवडणूक आयुक्त राजीव कुमार यांनी सांगितले की, राष्ट्रपतीपदाच्या निवडणुकीबाबत अधिसूचना जारी करण्यात आलीय. निवडणुकीत मतदानासाठी विशेष शाई पेन देण्यात येणार आहे. मतदान करण्यासाठी, तुम्हाला 1,2,3 लिहून तुमची निवड सांगावी लागेल. पहिली पसंती न दिल्यास, मतदान रद्द केलं जाईल.

त्याचबरोबर या काळात राजकीय पक्षांकडून कोणताही व्हीप करता येणार नाही. संसद आणि विधानसभेत मतदान होणार आहे. राज्यसभेचे महासचिव हे निवडणूक प्रभारी असतील. याशिवाय कोरोना प्रोटोकॉलचे पालन करण्याच्या सूचनाही देण्यात आल्या आहेत.

राष्ट्रपती राम नाथ कोविंद यांचा कार्यकाळ 24 जुलै 2022 रोजी संपत आहे. 17 जुलै 2017 रोजी अखेरच्या राष्ट्रपतीपदाच्या निवडणुका झाल्या. राष्ट्रपती निवडण्यासाठी सामान्य लोक मतदान करत नाहीत. त्यासाठी जनतेने निवडून दिलेले प्रतिनिधी आणि वरच्या सभागृहातील लोकप्रतिनिधी मतदान करतात. राष्ट्रपतीपदाच्या निवडणुकीत दोन्ही सभागृहांचे सदस्य (लोकसभा आणि राज्यसभा) प्रमाणेच मतदान करतील.

याशिवाय राष्ट्रपतीपदाच्या निवडणुकीसाठी सर्व राज्यांच्या विधानसभांचे सदस्यही मतदान करतात. त्यात दिल्ली आणि पुद्दुचेरी या केंद्रशासित प्रदेशांच्या विधानसभेच्या सदस्यांचाही समावेश आहे.

कोण राष्ट्रपती निवडणुकीत मतदान करू शकत नाहीत

◾ देशात राष्ट्रपतींच्या निवडणुकीत लोक मतदान करू शकत नाहीत. नामनिर्देशित सदस्य आणि विधान परिषदेच्या सदस्यांना अध्यक्षपदाच्या निवडणुकीत मतदानाचा अधिकार नाही.

◾ एखाद्या राज्याचा मुख्यमंत्री विधान परिषदेचा सदस्य असेल, तर त्यालाही राष्ट्रपतींच्या निवडणुकीत मतदान करता येत नाही.

◾ राष्ट्रपतीपदाच्या निवडणुकीत एकल हस्तांतरणीय मतदान प्रणालीद्वारे मतदान होते. म्हणजे राज्यसभा, लोकसभा आणि विधानसभेचा सदस्य एकच मत देऊ शकतो.

काय होते 2017 च्या राष्ट्रपती निवडणुकीचे निकाल?

17 जुलै 2017 रोजी राष्ट्रपतीपदाच्या निवडणुकीसाठी शेवटचे मतदान झाले होते. 20 जुलै रोजी मतमोजणी पूर्ण झाली ज्यामध्ये राम नाथ कोविंद यांना त्यांच्या जवळच्या प्रतिस्पर्धी मीरा कुमार यांचा 3 लाख 34 हजार 730 मतांनी पराभव करून विजयी घोषित करण्यात आलं.

न्यूज अनकट प्रतिनिधी: ईश्वर वाघमारे