पंतप्रधान नरेंद्र मोदींच्या भावाच्या कारला कर्नाटकात अपघात

म्हैसूर, २७ डिसेंबर २०२२ : पंतप्रधान नरेंद्र मोदी यांचे बंधू प्रल्हाद दामोदरदास मोदींच्या कारला म्हैसूर जवळील कडाकोळ येथे अपघात झाल्याची घटना घडली आहे. पंतप्रधान नरेंद्र मोदी यांचे बंधू प्रल्हाद दामोदरदास मोदी आणि त्यांचे कुटुंबीय ज्या बेंझ कारमधून जात होते, त्या कारला हा अपघात झाला.

मिळालेल्या माहितीनुसार, म्हैसूरहून बांदीपूरकडे जात असताना कडकोलाजवळ कार रस्त्याच्या दुभाजकाला धडकल्याने हा अपघात झाला. मंगळवारी दुपारी दोनच्या सुमारास ही घटना घडली. यावेळी कारमधून प्रल्हाद दामोदरदास मोदी, त्यांचा मुलगा, सून आणि नातू प्रवास करत होते. सर्व जखमी असून, त्यांना म्हैसूर येथील जेएसएस रुग्णालयात दाखल करण्यात आले आहे. मोदींच्या भावाच्या चेहऱ्याला दुखापत, सुनेच्या डोक्याला, नातवाच्या पायाला दुखापत झाली आहे. मुलगा आणि चालक सत्यनारायण यांनाही किरकोळ दुखापत झाल्याचे समजते आहे.

दरम्यान, प्रल्हाद मोदी हे गुजरात फेअर प्राइस शॉप्स अँड केरोसीन लायसन्स होल्डर असोसिएशनचे प्रमुख आहेत.

‘न्यूज अनकट’ प्रतिनिधी : प्रज्ञा फाटक.