रणवीर सिंगचा अनोखा लूक, रोहित शेट्टीने केली घोषणा

मुंबई, २६ नोव्हेंबर २०२२: सर्वांचाच लाडका बॉलीवूड अभिनेता रणवीर सिंग याचा नवाकोरा चित्रपट प्रेक्षकांचा भेटीला येणार आहे. रणवीर सिंगने अनेक चित्रपटांमध्ये वेगवेगळ्या प्रकारच्या भूमिका केल्या आहेत. खास प्रेक्षकांना हसवण्यासाठी रणवीर सिंग आता सज्ज झालाय. आतापर्यंत अनेक कॉमेडी चित्रपट देणारा रोहित शेट्टी परत एकदा प्रेक्षकांना हसवण्यासाठी सज्ज झालाय. लवकरच रोहित शेट्टीचा ‘सर्कस’ हा चित्रपट प्रेक्षकांच्या भेटीला येणार आहे. या चित्रपटात रणवीरसोबतच अभिनेत्री पूजा हेगडे ही देखील महत्त्वाच्या भूमिकेमध्ये आहे.

रोहित शेट्टीने ‘सर्कस’ या चित्रपटाचा टिझर आपल्या सोशल मीडियावर शेअर केला आहे. त्याने हा टिझर शेअर करताच हा व्हिडिओ सोशल मीडियावर तुफान व्हायरल होताना दिसत आहे. रोहित शेट्टी आणि रणवीर सिंगच्या चाहत्यांना चित्रपटाचा टिझर पाहूनच चित्रपटाची उत्सुकता लागली असल्याचे त्यांनी टिझरखाली कमेंट करून सांगितले आहे. रोहित शेट्टी यांनी याआधी देखील बॉलीवूड सिनेसृष्टीला अनेक कॉमेडी चित्रपट दिले आहेत. ‘चेन्नई एक्स्प्रेस’सारखे हीट चित्रपट बनवणारे चित्रपट निर्माता रोहित शेट्टी यांचा ‘सर्कस’ २३ डिसेंबरला रिलीज होणार आहे. तर ‘सर्कस’ या चित्रपटाचे लेखन युनूस सजवाल यांनी केले आहे.

‘सर्कस’ या चित्रपटात रणवीर सिंगचा वेगळाच आणि अतरंगी लूक चाहत्यांना बघायला मिळणार आहे. खरंतर रणवीर सिंग हा आधीच त्याचा वेगवेगळ्या लूक्ससाठी प्रसिद्ध आहे. या चित्रपटात त्याचा लूक कसा असेल? त्याची भूमिका तो नीट पार पाडू शकला असेल का? अशा अनेक प्रश्नांची उत्तरे चित्रपटातून प्रेक्षकांना मिळणार आहेत. सध्या बॉक्स ऑफिसवर रिलीज झालेले अनेक चित्रपट अपेक्षेपेक्षा कमी कमाई करीत आहेत. अशावेळी हा चित्रपट बॉक्स ऑफिसवर काय धमाका करणार याकडे सगळ्यांचेच लक्ष लागले आहे.

न्यूज अनकट प्रतिनिधी : ऋतुजा पंढरपुरे