रशियाचे परराष्ट्र मंत्री सर्गेई लावरोव नवी दिल्लीत दाखल, आज पंतप्रधान मोदी आणि परराष्ट्र मंत्र्यांची घेणार भेट

नवी दिल्ली, 1 एप्रिल 2022: रशियाचे परराष्ट्र मंत्री सर्गेई लावरोव नवी दिल्लीत दाखल झाले आहेत. आज शुक्रवार, 1 एप्रिल रोजी ते पंतप्रधान नरेंद्र मोदी यांची भेट घेणार आहेत. यानंतर ते परराष्ट्र मंत्री सुब्रह्मण्यम जयशंकर यांचीही भेट घेणार आहेत. रशियाच्या परराष्ट्र मंत्रालयाच्या प्रवक्त्या मारिया झाखारोवा यांनी यासंदर्भात माहिती दिली आहे.

लावरोव 31 मार्च ते 1 एप्रिल दरम्यान दिल्ली दौऱ्यावर असतील. यादरम्यान ते भारताचे परराष्ट्र मंत्री एस जयशंकर यांची भेट घेणार आहेत. यादरम्यान भारत रशियाकडून तेल आणि लष्करी उपकरणे खरेदीसाठी पेमेंट सिस्टमवर चर्चा करेल अशी अपेक्षा आहे.

रशियाच्या परराष्ट्रमंत्र्यांचा हा भारत दौरा अशा वेळी होत आहे, जेव्हा युक्रेनमध्ये युद्ध सुरू आहे, त्यामुळे संपूर्ण जगाचे लक्ष या बैठकीकडे लागले आहे. विशेष म्हणजे काही दिवसांपूर्वी चीनचे परराष्ट्र मंत्री भारत दौऱ्यावर आले आहेत.

या देशांच्या परराष्ट्र मंत्र्यांनीही भारताला भेट दिली

युक्रेन आणि रशियामधील युद्धाच्या पार्श्वभूमीवर गेल्या काही आठवड्यात अनेक परराष्ट्र मंत्र्यांनी भारताला भेट दिली आहे. यापूर्वी ऑस्ट्रिया आणि ग्रीसचे परराष्ट्र मंत्री भारत दौऱ्यावर आले होते. त्याच वेळी, अमेरिकेच्या राजनैतिक घडामोडींसाठी राज्य उपसचिव व्हिक्टोरिया नूलँड यांनीही या महिन्यात भारताला भेट दिली. दुसरीकडे, चीनचे परराष्ट्र मंत्री वांग यी यांनी 25 मार्च रोजी भारताला भेट दिली.

युद्धानंतर लव्हरोव्ह यांनी एस जयशंकर यांच्याशी केली चर्चा

ब्रिक्स गटाला जोपासण्यासाठी रशियाचे परराष्ट्र मंत्री लावरोव यांनी मॉस्कोमध्ये अनेक देशांच्या प्रतिनिधींची भेट घेतली. त्यात रशियातील भारताचे राजदूत पवन कपूर यांचाही समावेश होता. रशियाने युक्रेनवर केलेल्या हल्ल्यानंतर 24 फेब्रुवारीला सर्गेई लावरोव यांनी जयशंकर यांच्याशीही संवाद साधला होता.

भारत रशियाकडून करत आहे स्वस्त दरात तेल खरेदी

जागतिक निर्बंधानंतर रशियाने भारताला सवलतीच्या दरात तेल विकण्याची शिफारस केली होती. तेलाच्या वाढत्या किमतींमुळे भारतीय तेल कंपन्या आधीच रशियन तेल मोठ्या सवलतीत खरेदी करत आहेत. चीनचे परराष्ट्र मंत्री वांग यी यांनीही गेल्या आठवड्यात भारताला भेट दिली होती. भेटीदरम्यान त्यांनी डॉ. एस. जयशंकर यांच्याशी संवाद साधला. वांग यी यांनी राष्ट्रीय सुरक्षा सल्लागार अजित डोवाल यांचीही भेट घेतली. रशियाचे परराष्ट्र मंत्री डोवाल यांचीही भेट घेऊ शकतात, अशी अपेक्षा आहे.

न्यूज अनकट प्रतिनिधी: ईश्वर वाघमारे