पुणे, ९ डिसेंबर २०२३ : ज्येष्ठ माध्यमकर्मी डॉ. विश्वास मेहेंदळे (वय ८४) यांचे सोमवारी (ता. नऊ) वृद्धापकाळाने निधन झाले. मुलुंड पूर्व येथे त्यांचे पार्थिव अंत्यदर्शनासाठी ठेवण्यात आले आहे. ता. १० जुलै १९३९ रोजी डॉ. विश्वास मेहेंदळे यांचा जन्म झाला होता. त्यांनी काही काळ महाराष्ट्र शासनासाठीही काम केले आहे. विश्वास मेहंदळे वृत्तनिवेदक, लेखक, अभिनेतेही होते. अनेक कार्यक्रमांच्या सूत्रसंचालनासोबतच १८ हून अधिक पुस्तकांचे लेखन त्यांनी केले आहे. याव्यतिरिक्त मराठी नाट्यसृष्टीचे भाष्यकार म्हणूनही ते ओळखले जायचे.
ज्येष्ठ माध्यमकर्मी अशी ओळख असणारे विश्वास मेहेंदळे यांनी सुरवातीच्या काळात पुणे आणि कुलाबा येथील वेधशाळेमध्ये काही काळ नोकरी केली होती. त्यानंतर त्यांची मीडियासंबंधी कारकीर्द दूरदर्शनवर वृत्तनिवेदक म्हणून सुरू झाली. ते महाराष्ट्र शासनाच्या सांस्कृतिक खात्याचे संचालकही होते; तसेच पुणे विद्यापीठाच्या संज्ञापन विभागाचे खातेप्रमुख होते. ‘सिम्बायोसिस इन्स्टिट्यूट ऑफ मीडिया आणि कम्युनिकेशन’चे ते संस्थापक होते.
विश्वास मेहेंदळे यांची मीडियासंबंधी कारकीर्द वृत्तनिवेदक म्हणून सुरू झाली. डॉ. विश्वास मेहेंदळे हे दूरदर्शनचे पहिले मराठी वृत्तनिवेदक होते. दिल्ली आकाशवाणीवरून पहिल्या मराठी बातम्या वाचणारे ते निवेदक ठरले; तसेच मुंबई दूरदर्शनचे पहिले वृत्तनिवेदक होते. त्यानंतर त्यांनी दूरदर्शनच्या मुंबई केंद्राचे संचालक म्हणूनही काम पाहिले. केंद्र सरकारच्या सेवेतून मिळालेल्या प्रतिनियुक्तीत राज्याच्या सांस्कृतिक संचालनालयाचे ते संचालकही होते.
उत्तम कलाकार, लेखक अन् अभिनेते
विश्वास मेहेंदळे हे मराठी नाट्यसृष्टीचे भाष्यकार आहेत. ‘मला भेटलेली माणसे’ हा एकपात्री कार्यक्रम विशेष लोकप्रिय ठरला. याव्यतिरिक्त ‘अग्निदिव्य’, ‘एकच प्याला’, ‘एक तमाशा अच्छा खासा’, ‘खून पहावा करून’, ‘जर असं घडलं तर’, ‘नांदा सौख्यभरे’, ‘पंडित, आता तरी शहाणे व्हा’, ‘प्रेमा तुझा रंग कसा’ यांसारख्या गाजलेल्या नाटकांमध्ये मेहेंदळे यांनी भूमिका साकारल्या होत्या.
सृजन फाउंडेशनने महाराष्ट्र राज्यनिर्मितीच्या सुवर्णमहोत्सवी वर्षानिमित्त पुण्यात ता. १ ते ३ ऑक्टोबर २०१० या काळात भरविलेल्या नाट्यसंमेलनाचे अध्यक्षपद डॉ. विश्वास मेहेंदळे यांनी भूषविले होते; तसेच अखिल भारतीय मराठी नाट्यपरिषेच्या पुणे शाखेकडून ‘मधुकर टिल्लू स्मृती एकपात्री कलाकार’ पुरस्काराने त्यांना सन्मानित करण्यात आले होते.
डॉ. विश्वास मेहेंदळे लिखित आणि संपादित पुस्तके
‘आपले पंतप्रधान’, ‘आपले वैज्ञानिक’, ‘ओली-सुकी’, ‘इंदिरा गांधी व लीला गांधी’, ‘केसरीकारांच्या पांच पिढ्या’, ‘गांधी ते पटेल’, ‘तुझी माझी जोडी’, ‘नरम-गरम’, ‘नाट्यद्वयी’, ‘पंडितजी ते अटलजी’, ‘भटाचा पोर’, ‘मला भेटलेली माणसं’, ‘मला माहीत असलेले शरद पवार’, ‘मीडिया’, ‘यशवंतराव चव्हाण ते पृथ्वीराज चव्हाण’, ‘यशवंतराव ते अशोकराव’, ‘यशवंतराव ते विलासराव’, ‘राष्ट्रपती’, ‘सरसंघचालक’.
‘न्यूज अनकट’ प्रतिनिधी : सतीश पाटील
