षटकार ठोकल्यावर शाहीन आफ्रिदीचा ‘चढला पारा’, बांगलादेशी फलंदाजाला मारला चेंडू

21 नोव्हेंबर 2021: T20 विश्वचषकात पाकिस्तानने जबरदस्त खेळ दाखवला, पण त्यांना स्पर्धा जिंकता आली नाही. सध्या पाकिस्तानचा संघ बांगलादेशमध्ये तीन टी-20 सामन्यांची मालिका खेळत आहे. शनिवारी या दोन्ही संघांमध्ये दुसरा सामना खेळला जात असताना, असे काही घडले ज्यामुळे एका नव्या वादाला तोंड फुटले.

पाकिस्तानचा वेगवान गोलंदाज शाहीन शाह आफ्रिदीने गोलंदाजी करताना बांगलादेशी फलंदाजाला चेंडू फेकून मारला. शाहीन शाह आफ्रिदीने हे कृत्य केल्यानंतर लगेच माफी मागितली, मात्र त्याचा हा व्हिडिओ सोशल मीडियावर वेगाने व्हायरल होत आहे. शेवटी काय झालं होतं, एकदा समजून घ्या…

ढाका येथे खेळल्या जात असलेल्या दुसऱ्या T20 सामन्यात बांगलादेशचा संघ प्रथम फलंदाजी करत होता. डावाच्या तिसऱ्या षटकात शाहीन आफ्रिदी गोलंदाजीसाठी आला तेव्हा दुसऱ्या चेंडूवर अफिफ हुसेनने षटकार ठोकला. यानंतर शाहीन आफ्रिदीने पुढचा चेंडू टाकला, तेव्हा अफिफने तो सरळ खेळला आणि तो चेंडू शाहीनकडे पोहोचला.

पण, पुढच्याच सेकंदाला शाहीनने तो चेंडू थेट अफिफच्या दिशेने फेकला, चेंडू त्याच्या पायाला लागला आणि अफिफ जमिनीवर पडला. नंतर पाकिस्तानी संघाचे इतर खेळाडू जवळ आले, शाहीननेही नंतर अफिफची माफी मागितली. मात्र षटकार खाल्ल्यानंतर शाहीन आफ्रिदीच्या चेहऱ्यावर ज्या प्रकारची निराशा दिसत होती, त्यावरून हे रागाच्या भरात घडल्याचे समजू शकते.

मात्र या सामन्यात शाहीन आफ्रिदीने चांगली गोलंदाजी केली. त्याच्या चार षटकात त्याने 15 धावा दिल्या, दोन विकेट घेतल्या. त्याच्या संपूर्ण स्पेलमध्ये फक्त एकच षटकार होता, ज्यानंतर तो शांत झाला. बांगलादेशच्या संघाने प्रथम फलंदाजी करताना केवळ 108 धावा केल्या होत्या.

न्यूज अनकट प्रतिनिधी: ईश्वर वाघमारे

संबंधित लेखया लेखकाकडून अधिक

कृपया आपले प्रतिक्रिया कळवावी

कृपया आपली टिप्पणी द्या!
कृपया येथे आपले नाव प्रविष्ट करा