शिवभोजनासाठी आधारकार्डची सक्ती नाही: छगन भुजबळ

मुंबई : २६ जानेवारीला सुरु होणारे ‘शिवभोजन’ हे गरीब व गरजू व्यक्तीसाठी आहे. यासाठी आधारकार्डची सक्ती केली नाही. शिवभोजन केंद्रावर प्रथम येणाऱ्यास प्रथम प्राधान्य देऊन शिवभोजन योजनेचा लाभ दिला जाणार असल्याची माहिती अन्न, नागरी पुरवठा व ग्राहक संरक्षण मंत्री छगन भुजबळ यांनी दिली.

याबाबत भुजबळ म्हणाले की, या योजनेअंतर्गत प्रारंभी प्रायोगिक तत्वावर राज्यात प्रत्येक जिल्ह्याचे मुख्यालय व महानगरपालिका क्षेत्रात किमान एक भोजनालय सुरु होणार आहे.
भोजनालय वर्दळीच्या ठिकाणी असून सदर भोजनालये दु. १२ ते २ या वेळेत सुरु राहतील. या भोजनालयात सदर वेळेत या योजनेच्या लाभार्थ्यांसाठी राखीव जागा उपलब्ध करून देण्याची जबाबदारी भोजनालय चालकाची राहील.
भोजनालयासाठी चालकाकडे स्वत:ची जागा असावी. भोजनालयात एका वेळी किमान २५ जणांच्या जेवणासाठी बसण्याची व्यवस्था असावी. भोजनालयात किमान ७५ तर कमाल १५० थाळी जेवण मिळणार आहे.