व्हाईट हाऊसच्या बाहेर गोळीबार, ट्रम्प यांना सोडावी लागली पत्रकार परिषद

वॉशिंग्टन, ११ ऑगस्ट २०२०: अमेरिकेत व्हाईट हाऊसच्या बाहेर गोळीबार झाला आहे. अमेरिकेचे अध्यक्ष डोनाल्ड ट्रम्प यांनी पत्रकारांशी बोलताना ही माहिती दिली. ते म्हणाले की, व्हाईट हाऊसच्या बाहेर गोळीबार झाल्याचे वृत्त आहे. तथापि, आता परिस्थिती नियंत्रणात आहे. व्हाईट हाऊसच्या बाहेर गोळीबार झाला तेव्हा डोनाल्ड ट्रम्प पत्रकार परिषद घेत होते. सिक्रेट सर्व्हिसच्या अधिका-यांनी ट्रम्प यांना व्यासपीठावरुन उतरण्यास सांगितले. प्रेस ब्रिफिंगसुद्धा काही काळ थांबवावी लागली.

डोनाल्ड ट्रम्प म्हणाले की, “व्हाईट हाऊसच्या बाहेर गोळीबार झाला आहे. तथापि, परिस्थिती नियंत्रणात असल्याचे दिसते. तत्पर आणि प्रभावी कार्यासाठी मी गुप्तचर सेवेचे आभार मानू इच्छितो. एका व्यक्तिला दवाखान्यात हलवण्यात आले आहे. गुप्तचर संघटनेच्या अधिकाऱ्यांनी त्या व्यक्तीला गोळ्या मारल्या असाव्यात. सीक्रेट सर्व्हिसने गोळीबाराची पुष्टी केली आहे. ” ट्विटमध्ये असे म्हटले गेले आहे की १७ व्या स्ट्रीट आणि पेनसिल्व्हेनिया अव्हेन्यूमधील गोळीबारामध्ये एक अधिकारी सहभागी होता.

गोळीबाराच्या घटनेपूर्वी पत्रकारांना संबोधित करताना ट्रम्प यांनी अमेरिकेतील कोरोना संकटाकडे लक्ष वेधले. डोनाल्ड ट्रम्प म्हणाले की, “आम्ही जवळपास ५० कोटी लोकांची चाचणी केली आहे. कोणताही देश त्या संख्येच्या जवळ नाही. १० कोटी चाचण्यांसह भारत दुसर्‍या स्थानावर असेल.” ट्रम्प म्हणाले की, “माझा विश्वास आहे की कोरोनाविरूद्धच्या लढाईत या वर्षाच्या अखेरीस आपल्याकडे लस नक्कीच असेल.”

डोनाल्ड ट्रम्प यांनी यावेळीही चीनवर निशाणा साधला. अध्यक्ष ट्रम्प म्हणाले की, “चीनने जे काही केले त्याबाबत अमेरिका संतप्त आहे. जर मी निवडणूक जिंकली तर मी प्रामाणिकपणे असे म्हणतो की, एका महिन्यात इराण आमच्याशी करार करेल. परंतु हे नक्की की आमचा चीन सोबत कोणताही मैत्री करार होण्याची शक्यता नाही.

न्यूज अनकट प्रतिनिधी