आता भारतात उपलब्ध होणार सिंगल डोस कोरोना लस, जॉन्सन अँड जॉन्सनची लस मंजूर

नवी दिल्ली, ८ ऑगस्ट २०२१: अमेरिकन कंपनी जॉन्सन अँड जॉन्सनच्या सिंगल डोस लसीला भारतात इमरजेंसी वापरासाठी मंजुरी मिळाली आहे.  आरोग्यमंत्री मनसुख मांडविया यांनी ही माहिती दिली.  विशेष गोष्ट अशी आहे की भारतात वापरली जाणारी ही पहिली लस असेल, जी केवळ एका डोसमध्ये कोरोनाविरूद्ध प्रभावी ठरेल.

 मनसुख मांडविया यांनी ट्विट केले, भारताने आपली व्हॅक्सिन बास्केट वाढवली आहे.  जॉन्सन अँड जॉन्सनला भारतात आपत्कालीन वापरासाठी मंजुरी मिळाली आहे.  आतापर्यंत भारतात ५ लसी आपत्कालीन वापरासाठी मंजूर झाल्या आहेत. मांडविया म्हणाले, यामुळे कोरोना विरुद्ध आपल्या देशाच्या लढ्याला आणखी चालना मिळेल.

 कंपनीचा दावा – लस ८५% प्रभावी

  ५ ऑगस्ट रोजी जॉन्सन अँड जॉन्सनने सिंगल डोस लसीच्या वापरासाठी भारत सरकारकडे मंजुरी मागितली होती.  कंपनीच्या मते, चाचणीमध्ये लस ८५% प्रभावी असल्याचे दर्शविले गेले आहे.

देण्यात आली या लसींना मान्यता

जॉन्सन ही कोविशिल्ड, कोव्हॅक्सिन, स्पुटनिक व्ही आणि मॉडर्ना नंतर मंजूर झालेली पाचवी लस आहे.  तथापि, सीरम इन्स्टिट्यूटची कोविशील्ड, भारत बायोटेकची कोव्हॅक्सिन आणि रशियाची स्पुटनिक व्ही लस सध्या भारतात वापरली जात आहे.  सरकारी केंद्रांवर कोविशिल्ड, कोव्हॅक्सिन दिले जात आहेत.  तर स्पुटनिक खाजगी रुग्णालयांमध्ये देखील उपलब्ध आहे.  सध्या भारतात वापरल्या जाणाऱ्या लसीचे दोन डोस दिले जात आहेत.

न्यूज अनकट प्रतिनिधी: ईश्वर वाघमारे