नवी दिल्ली, 22 एप्रिल 2022: एअर इंडिया हातात घेताच टाटा समूहाने विमान कंपन्यांची कामगिरी सुधारण्यासाठी प्रयत्न सुरू केले आहेत. अनेक आघाड्यांवर काम करणारे टाटा आता कर्मचाऱ्यांना त्यांची प्रोडक्टिविटी वाढवण्यासाठी खास भेट देणार आहेत. यानंतर एअर इंडियाचे कर्मचारी थेट कंपनीचे भागीदार बनतील.
मिळू शकतो ESOPs चा फायदा
एअर इंडिया आपल्या कर्मचाऱ्यांना लवकरच भागीदार बनवू शकते. यासाठी त्यांना त्यांच्या पगाराचा एक भाग म्हणून ‘एम्प्लॉई स्टॉक ऑप्शन्स’ (ESOPs) चा लाभ मिळू शकतो. यामुळे कंपनीच्या कर्मचाऱ्यांमध्ये मालकी हक्काची भावना निर्माण होईल आणि त्यांच्या कामगिरीत सुधारणा होण्याची अपेक्षा आहे, असा या समूहाचा विश्वास आहे. यासोबतच कर्मचाऱ्यांना कंपनीच्या शेअरच्या किमतीचाही लाभ मिळणार आहे. सध्या, एअर इंडियाची प्रतिस्पर्धी कंपनी इंडिगो आणि स्पाइसजेट त्यांच्या कर्मचाऱ्यांना ESOPs चा लाभ देतात.
आधीच दिला आहे ईपीएफओचा लाभ
जोपर्यंत एअर इंडिया सरकारकडे होती, तोपर्यंत त्यांच्या कर्मचाऱ्यांना कर्मचारी भविष्य निर्वाह निधी संघटना (EPFO) योजनांचा लाभ मिळत नव्हता. पण टाटा समूहाच्या हातात येताच कंपनीच्या कर्मचाऱ्यांसाठी अनेक गोष्टी बदलल्या. पेन्शन आणि रिटायरमेंट फंडाच्या फायद्यांमध्ये सर्वात मोठा बदल झाला आणि एअर इंडिया EPFO द्वारे ऑनबोर्ड झाला. त्यामुळे विमान कंपन्यांच्या कर्मचाऱ्यांना अधिक पीएफचा लाभ मिळू लागला आहे.
15 मे पासून नवीन वैद्यकीय विमा
टाटा समूह पुढील महिन्याच्या 15 तारखेपासून एअर इंडियाच्या कर्मचाऱ्यांना आणखी एक मोठा फायदा देणार आहे. कंपनीने सोमवारी एका निवेदनात म्हटले होते की, 15 मे पासून कंपनीच्या सर्व कर्मचाऱ्यांना नवीन ग्रुप मेडिकल इन्शुरन्स पॉलिसीचा लाभ मिळण्यास सुरुवात होईल. यामध्ये कायमस्वरूपी आणि तात्पुरत्या कर्मचाऱ्यांचा समावेश असेल. नवीन मेडिकल ग्रुप इन्शुरन्समुळे कंपनीच्या कर्मचाऱ्यांना देशभरातील मोठ्या हॉस्पिटल नेटवर्क आणि चांगल्या आरोग्य सुविधा उपलब्ध होतील.
न्यूज अनकट प्रतिनिधी: ईश्वर वाघमारे
