शाळांमध्ये वर्ग सुरू करण्यासाठी केंद्राने जारी केले मार्गदर्शक तत्त्वे आणि एसओपी

नवी दिल्ली, 4 फेब्रुवारी 2022: केंद्राने देशभरातील शाळा आणि महाविद्यालयं पुन्हा सुरू करण्यासाठी नवीन आणि सुधारित मार्गदर्शक तत्त्वे आणि कोविड प्रोटोकॉल जारी केले आहेत. सविस्तर चर्चेनंतर, शाळा पुन्हा सुरू करण्यासाठी केंद्राने मार्गदर्शक तत्त्वे तयार केली आहेत, ज्याचं राज्य आणि केंद्रशासित प्रदेशांनी पालन केलं पाहिजे.

शालेय शिक्षण आणि साक्षरता विभागाचे संयुक्त सचिव (जेएस) म्हणाले, “शाळा पुन्हा सुरू करण्यासाठी आणि सामाजिक अंतरासह शिकण्यासाठी आरोग्य आणि सुरक्षा प्रोटोकॉलच्या मार्गदर्शक तत्त्वांचं पालन करणं आवश्यक आहे.” आत्तापर्यंत 11 राज्यांमध्ये शाळा उघडण्यात आल्या आहेत. 16 राज्यांमध्ये शाळा अंशत: उघडण्यात आल्या आहेत तर 9 राज्यांमध्ये शैक्षणिक संस्था बंद ठेवण्यात आल्या आहेत.

केंद्राच्या या मार्गदर्शक सूचनांचं पालन करणं बंधनकारक

• शाळेत योग्य स्वच्छता आणि स्वच्छता सुविधा सुनिश्चित करणं आणि त्यांचे निरीक्षण करणं.
• सीटिंग प्लॅनमध्ये विद्यार्थ्यांमध्ये किमान 6 फूट अंतर राखणं.
• स्टाफ रूम, ऑफिस एरिया, असेंब्ली हॉल आणि इतर सामान्य भागात सामाजिक अंतर पाळणं.
• विविध वर्गांसाठी मर्यादित आणि लवचिक वेळा.
• अशा सामाजिक कार्यक्रमांचे आयोजन करणार नाहीत ज्यात सामाजिक अंतर शक्य नाही.
• सर्व विद्यार्थी आणि कर्मचारी फेस कव्हर/मास्क घालून शाळेत येणं आणि संपूर्ण वेळ ते परिधान करणं.
• पीएम पोषण (मिड-डे मील) च्या वितरणादरम्यान सामाजिक अंतराचं पालन.
• शालेय वाहतूक नियमितपणे स्वच्छ करणं
  वसतिगृहांमधील खाटांमधील पुरेसे अंतर सुनिश्चित करणं.
• वसतिगृहांमध्ये नेहमीच सामाजिक अंतर पाळणं.
• घरून अभ्यास करू इच्छिणाऱ्या विद्यार्थ्यांना पालकांच्या संमतीने असं करण्याची परवानगी दिली जाऊ शकते.
• उपस्थितीत लवचिकता असावी

केंद्रीय संस्थांमधील शिक्षक आणि कर्मचाऱ्यांच्या लसीकरणाचे काम जोरात सुरू आहे. 98.85% शिक्षक आणि 99.07% शिक्षकेतर कर्मचाऱ्यांचे लसीकरण पूर्ण झालं आहे. शाळांबाबत केंद्राची मार्गदर्शक तत्त्वे डिसेंबर 2021 मध्ये सुधारित आणि प्रसिद्ध करण्यात आली होती, परंतु कोरोनाच्या ओमिक्रॉन प्रकाराच्या प्रसारामुळं त्यांची अंमलबजावणी लांबणीवर पडली होती. या मार्गदर्शक तत्त्वांचं पालन करून सर्व राज्ये ऑफलाइन वर्ग सुरू करतील.

न्यूज अनकट प्रतिनिधी: ईश्वर वाघमारे