आयपीएल मीडिया राइट्स लिलाव आजपासून, बोर्डाला 45 ते 50 हजार कोटी रुपये मिळण्याची अपेक्षा

पुणे, 12 जून 2022: इंडियन प्रीमियर लीग (IPL) च्या पुढील पाच हंगामांसाठी (2023 ते 2027) मीडिया हक्कांचा लिलाव रविवारपासून सुरू होत आहे. ई-लिलावाची प्रक्रिया सकाळी 11 वाजता सुरू होईल. पहिल्यांदाच मीडिया हक्कांचा लिलाव होणार आहे. भारतीय क्रिकेट नियामक मंडळाने (बीसीसीआय) लिलाव संपण्यासाठी कोणतीही अंतिम मुदत निश्चित केलेली नाही. त्यामुळं विजेत्या कंपनीची घोषणा होण्यास एक दिवसापेक्षा जास्त कालावधी लागण्याची शक्यता आहे.

चार वेगवेगळ्या पॅकेजसाठी लागणार बोली

◾ पहिल्या पॅकेजमध्ये भारतीय उपखंडातील टीव्ही हक्कांचा समावेश आहे. म्हणजेच ती मिळवणारी कंपनी भारतासह दक्षिण आशियातील देशांमध्ये या लीगचे प्रसारण टीव्हीवर करेल. या पॅकेजमधील एका सामन्याची मूळ किंमत 49 कोटी रुपये आहे.

◾ दुसरे पॅकेज भारतीय उपखंडातील डिजिटल अधिकारांचे आहे. अधिग्रहण करणारी कंपनी दक्षिण आशियातील डिजिटल प्लॅटफॉर्मवर लीगचे प्रसारण करेल. एका सामन्याची मूळ किंमत 33 कोटी रुपये आहे.

◾ तिसऱ्या पॅकेजमध्ये 18 निवडक सामन्यांचे डिजिटल अधिकार समाविष्ट आहेत. यामध्ये हंगामातील पहिला सामना, संध्याकाळचा सामना आणि आठवड्याच्या शेवटी होणार्‍या प्रत्येक डबल हेडरमधील चार प्लेऑफ सामन्यांचा समावेश आहे. एका सामन्याची मूळ किंमत 11 कोटी रुपये आहे.

◾ चौथ्या पॅकेजमध्ये भारतीय उपखंडाबाहेरील टीव्ही आणि डिजिटल प्रसारण अधिकारांचा समावेश आहे. एका सामन्याची मूळ किंमत 3 कोटी रुपये आहे.

सर्व चार पॅकेजेसची एकत्रित मूळ किंमत 32,890 कोटी रुपये

जर चार पॅकेजेसची आधारभूत किंमत जोडली गेली, तर 5 वर्षांत खेळल्या जाणाऱ्या 370 सामन्यांची एकत्रित आधारभूत किंमत 32,890 कोटी रुपये आहे. गेल्या वेळी (2018 ते 2022) मीडिया हक्क 16,347 कोटी रुपयांना विकले गेले होते. म्हणजेच या वेळी आधारभूत किमतीतच मीडिया हक्क विकले गेले, तर बीसीसीआयला गेल्या वेळेच्या तुलनेत दुप्पट रक्कम मिळण्याची खात्री आहे.

बीसीसीआयला 45 ते 50 हजार कोटी रुपये मिळण्याची अपेक्षा

भारतीय क्रिकेट बोर्डाला यावेळी मीडिया हक्कांच्या लिलावातून 45 ते 20 हजार कोटी मिळू शकतील अशी अपेक्षा आहे. काही तज्ज्ञ 60 हजार कोटी रुपयांचीही चर्चा करत आहेत.

पहिल्या आणि दुसऱ्या पॅकेजसाठी रिलायन्स आणि स्टार यांच्यात खडतर स्पर्धा

लिलावात 8 कंपन्या स्पर्धेत असल्या तरी, भारतीय उपखंडात मुकेश अंबानी यांच्या Viacom18 आणि Star for TV आणि डिजिटल अधिकार (1ले आणि 2रे पॅकेज) यांच्यात खडतर स्पर्धा अपेक्षित आहे. सोनीही लिलावात उतरत आहे, पण ज्या प्रकारे कंपनीने जास्त आधारभूत किमतीला आक्षेप घेतला आहे, त्यामुळं ती आक्रमक बोली लावण्याची शक्यता कमी आहे.

◾ Times Internet, Fun Asia आणि Dream11 फक्त भारतीय उपखंडाच्या डिजिटल अधिकारांसाठी (दुसरे पॅकेज) बोली लावू शकतात.

◾ स्काय स्पोर्ट्स आणि सुपर स्पोर्ट्स परदेशी बाजारासाठी हक्क (चौथे पॅकेज) खरेदी करण्यावर भर देतील.

न्यूज अनकट प्रतिनिधी: ईश्वर वाघमारे