एमपीएससी परीक्षेत तिसऱ्या आलेल्या दर्शना पवार हत्या प्रकरणातील मुख्य आरोपीस अटक

6

पुणे २२ जून २०२३: महाराष्ट्र लोकसेवा आयोगाच्या परीक्षेत राज्यात तिसरी आलेल्या दर्शना पवार हिच्या हत्या प्रकरणात मोठी बातमी समोर आलीय. या प्रकरणात मुख्य आरोपी राहुल हंडोरेला अटक करण्यात आली. गेल्या काही दिवसांपासून पुणे ग्रामीण पोलीस मुख्य आरोपी राहुल हंडोरे याचा शोध घेत होते, अखेरीस त्याला अटक झाली. हंडोरे याला मुंबईतून अटक करण्यात आलीय. या हत्याकांड प्रकरणात आज दुपारी पत्रकार परिषद घेऊन पोलीस माहिती देणार आहेत. या प्रकारामुळे राज्यात खळबळ माजली होती. दरम्यान या प्रकरणातील आरोपींना अटक करण्यासाठी आज मराठा क्रांती मोर्चाच्या वतीने नगर जिल्ह्यात मोर्चाचा इशारा देण्यात आला आहे.

पुण्याच्या वेल्हा तालुक्यातील किल्ले राजगड किल्ल्याच्या पायथ्याशी रविवारी दर्शना पवार हिचा मृतदेह सापडला होता. ती बेपत्ता झाल्याची तक्रार पंधरा जून रोजी तिच्या पालकांनी नोंदवली, त्यानंतर अठरा जून रोजी सकाळी तिचा मृतदेह कुजलेल्या अवस्थेत आढळला. मृतदेहाची ओळख पटवणे अवघड जात होते. या प्रकरणी घातपाताची शक्यता पुणे पोलिसांनी व्यक्त केली होती. दर्शना आणि राहुल एकमेकांचे नातेवाईक असुन दोघे एकमेकांना अनेक वर्षांपासून ओळखत होते. दर्शनासोबत लग्न करण्याची राहुलची इच्छा होती. दोघेही एमपीएससीची परीक्षा देत होते. दोघांपैकी दर्शना आधी एमपीएससी ची वन विभागाची परीक्षा उत्तीर्ण झाली.

दर्शना फक्त वन अधिकारी बनण्याची औपचारिकताच बाकी होती. त्यानंतर दर्शनाच्या घरच्यांनी तिचे लग्न दुसर्‍या मुलासोबत जमवले आणि लग्नाच्या हालचाली सुरु केल्या. त्यामुळे राहुल हंडोरे अस्वस्थ होता. त्याने त्याला एमपीएससीची परीक्षा उत्तीर्ण होण्यासाठी थोडा वेळ द्यावा, असा आग्रह धरला. तो देखील परीक्षा उत्तीर्ण होऊन अधिकारी बनेल, असे दर्शना आणि तिच्या कुटुंबियांना सांगून पाहिले. मात्र त्याला प्रतिसाद मिळत नसल्याने राहुलने राजगडाच्या पायथ्याशी दर्शनाची हत्या केली.

दर्शना आणि राहुल दोघेही १२ जूनला फिरण्यासाठी राजगडावर गेले. त्या दिवशी सकाळी सव्वा आठ वाजता गडाच्या पायथ्याशी ते पोहचले. त्यानंतर दोघांनीही गड चढायला सुरुवात केली. दोघे गड चढत असल्याचे सीसीटीव्ही फुटेजमध्ये चित्रित झाले असुन फुटेजमध्ये दोघेही राजगडावर जाताना दिसत होते. मात्र त्यानंतर दहा वाजता राहुल हंडोरे एकटाच परत आला. त्यामुळे पोलिसांना त्याच्यावर संशय घेऊन त्याचा शोध सुरु केला. त्याच्या शोधासाठी पाच पथके तयार केली होती. अखेर त्याला पकडण्यात पोलिसांना यश आले.

न्यूज अनकट प्रतिनिधी- अनिल खळदकर

कृपया आपले प्रतिक्रिया कळवावी

कृपया आपली टिप्पणी द्या!
कृपया येथे आपले नाव प्रविष्ट करा