मुंबईत सी-लिंकवर भरधाव मर्सिडीजची दुसऱ्या कारला धडक, दोन जण जखमी

मुंबई, २१ ऑगस्ट २०२३ : मुंबईच्या वांद्रे-वरळी सी-लिंकवर एका १९ वर्षीय महाविद्यालयीन विद्यार्थ्याची मर्सिडीज कार दुसऱ्या कारला धडकली असून यात दोन जण जखमी झाले आहेत. वरळी पोलीस ठाण्याच्या अधिकाऱ्याने सांगितले की, रविवारी सकाळी ही घटना घडली.

आरोपीचे नाव जय बनसोडे असे असून त्याला अटक करण्यात आल्याचे त्यांनी सांगितले. आरोपी हा शेजारच्या ठाणे जिल्ह्यातील भाईंदर येथील रहिवासी असून तो त्याच्या नातेवाईकाची कार चालवत होता. घटनेनंतर बनसोडे घटनास्थळावरून पळून गेला, परंतु पोलिसांनी कारच्या नोंदणी क्रमांकाच्या मदतीने त्याला पकडले आणि कार ताब्यात घेतली.

पोलिसांनी सांगितले की, प्राथमिक माहितीच्या आधारे बनसोडेला अटक करण्यात आली असून त्याच्यावर बेदरकारपणे वाहन चालवणे आणि इतर कायदेशीर तरतुदींनुसार गुन्हा दाखल करण्यात आला आहे. दीपक कस्तुरी आणि अंजली अग्रवाल अशी जखमींची नावे असुन दोघांवर रुग्णालयात उपचार सुरू असून ते आता धोक्याबाहेर आहेत.

न्यूज अनकट प्रतिनिधी : सूरज गायकवाड