श्रीनगर, १ ऑक्टोबर २०२२ : उत्तर काश्मीरच्या बारामुल्ला जिल्ह्यातील पट्टणच्या येडीपोरा गावात शुक्रवारी झालेल्या चकमकीत जैशच्या दोन दहशतवाद्यांना ठार मारण्यात आले आहे. हे दहशतवादी बारामुल्ला येथील अग्निवीर भरती रॅलीवर हल्ला करण्याची योजना आखत होते. बारामुल्लाचे वरिष्ठ पोलीस अधीक्षक रईस मोहम्मद भट यांनी पत्रकार परिषदेत सांगितले की, दहशतवादी जिल्ह्यातील १० सेक्टर हैदरबेग मुख्यालयात सुरू असलेल्या लष्कराच्या भरती रॅलीवर हल्ला करण्याच्या उद्देशाने बारामुल्ला येथे आले होते.
बारामुल्लाचे वरिष्ठ पोलीस अधीक्षक रईस भट यांनी पत्रकारांना सांगितले, की गुप्तचर यंत्रणेकडून दहशतवादी लपून बसल्याची माहिती मिळाल्यानंतर सुरक्षा दलांनी शुक्रवारी पहाटेच पट्टणमधील येदीपोरा भागात नाकाबंदी आणि तपास मोहीम सुरू केली.
या मोहिमेदरम्यान या भागात लपलेल्या दहशतवाद्यांनी सुरक्षा दल पथकांवर गोळीबार केला. त्यानंतर सकाळी दीर्घकाळ चकमक चालली. अखेर त्यात दोन दहशतवादी मृत्युमुखी पडले. पट्टण येथील हैदरबेग भागात सुरू असलेल्या लष्कराच्या अग्निवीर भरतीच्या ठिकाणी हल्ला करण्याचा कट या दहशतवाद्यांनी रचला होता.
न्यूज अनकट प्रतिनिधी – सुरज गायकवाड
