युपी निवडणुका- प्रियांका गांधींची मोठी घोषणा; काँग्रेस 403 पैकी 161 जागांवर महिलांना तिकीट देणार

नवी दिल्ली, 20 ऑक्टोंबर 2021: उत्तर प्रदेशातील पुढील वर्षी होणाऱ्या विधानसभा निवडणुकीत काँग्रेस महिलांना 40% तिकिटे देणार आहे. पक्षाच्या सरचिटणीस प्रियंका गांधी यांनी मंगळवारी लखनऊमध्ये पत्रकार परिषदेत ही मोठी घोषणा केली. प्रियंका म्हणाल्या की हा निर्णय सर्व पीडित महिलांना न्याय देईल. प्रियांका यांनी ‘लड़की हूं लड़ सकती हूं’ असा नवा नारा दिला.

40% महिलांना तिकीट देण्यासाठी काँग्रेस उत्तर प्रदेशातील एकूण 403 विधानसभा जागांपैकी 161 मध्ये महिला उमेदवार उभे करेल. प्रियांका जेव्हा ही घोषणा करत होत्या, तेव्हाही त्यांच्या मंचावर 7 पुरुष उपस्थित होते आणि फक्त दोन महिला त्यांच्या शेजारी बसल्या होत्या. यावरून असा अंदाज बांधता येतो की, महिलांना तिकीट देण्याचा पक्षाचा निर्णय खूप आव्हानात्मक असणार आहे.

प्रियांका यांना कुटुंबवादा बद्दल हरकत नाही

काँग्रेसने महिलांना 40% तिकिटे देण्याची घोषणा केली असेल, परंतु नेत्यांच्या कुटुंबातील महिलांचेही वर्चस्व असण्याची शक्यता आहे. प्रियंका गांधी यांनी स्वतः पत्रकार परिषदेत कुटुंबवादाचे समर्थन केले. जेव्हा त्यांना प्रश्न विचारण्यात आला की कॉंग्रेसने 40% महिलांना तिकीट देण्याची घोषणा केली आहे, परंतु सर्व प्रभावी नेते फक्त त्यांच्या कुटुंबातील महिलांना तिकीट मिळवण्यासाठी लॉबिंग करतील. यावर प्रियंका म्हणाल्या की यात काही नुकसान नाही.

प्रियांका यांनी स्वतः निवडणूक लढवण्याचा प्रश्न टाळला

प्रियंका म्हणाल्या की आम्ही अर्ज मागवले आहेत आणि 15 नोव्हेंबर पर्यंत लोक तिकिटांसाठी अर्ज करू शकतात. गुणवत्तेच्या आधारावर महिलांना तिकिटे दिली जातील. प्रियांका म्हणाल्या की जर शक्य झालं असतं तर त्यांनी 40 ऐवजी 50 टक्के तिकिटे महिलांना दिली असती. जेव्हा त्यांना विधानसभा निवडणूक लढवण्याबाबत विचारण्यात आले, तेव्हा त्यांनी सांगितले की, त्याबद्दल नंतर विचार करू. त्याचवेळी, यूपीमध्ये काँग्रेस सीएम चेहऱ्यासोबत जाण्याच्या प्रश्नावर त्या म्हणाल्या की, अद्याप यावर निर्णय झालेला नाही.

न्यूज अनकट प्रतिनिधी: ईश्वर वाघमारे