वसई येथे सासूने केली सुनेची हत्या

मुंबई: वसई शहरात सासूने सुनेची निघृण हत्या केल्याची घटना समोर आली आहे. वसईतील एका प्रतिष्ठीत कुंटुबात हे हत्याकांड घडल्याने आश्चर्य व्यक्त करण्यात येत आहे. या घटनेवर घरच्यांचा अद्यापही विश्वास बसत नसल्याचे चित्र सध्या आहे.

त्यांची सून आणि मुलगा हे अमेरिकेला राहतात. महिनाभराच्या सुट्टीनिमित्त भारतात आले होते. हत्येनंतर सासू स्वतःहून पोलीस ठाण्यात हजर झाली होती. सासूला सून आवडत नसल्याने ही हत्या केल्याची माहिती समोर येत आहे.

मृत ३२ वर्षीय रिया माने हिचा पती रोहन माने हा अमेरिकेत इंजिनिअर पदावर नोकरी करतो. तर, रिया ही नर्सची नोकरी करते. या दोघांचा सहा वर्षापूर्वी विवाह झाला होता. त्यांना एक लहानशी मुलगी ही आहे. एक डिसेंबरला रोहन आपली पत्नी आणि लहानग्या मुलीसोबत वसईला आपल्या आई-वडिलांकडे आला होता.

रोहनचं लग्न झाल्यापासून रिया ही सासू आनंदीला आवडत नव्हती. अधून मधून या दोघांमध्ये वादविवाद ही होत होते. त्यातच आपल्या मुलाला आपल्याकडून लांब नेले हाही राग सासूच्या मनात रटमटत होता.
रविवारी (दि.१५) रोजी सकाळी रियाची सासू आरोपी आनंदी माने हिने रियाच्या बेडरुममध्ये जावून, जवळच्याच फ्लॉवर पॉटने झोपेलेल्या रियाच्या डोक्यावर प्रहार करुन तिला ठार केले. त्यानंतर स्वतः माणिकपूर पोलीस ठाण्यात जावून पोलीस ठाण्यात हजर झाल्या. पोलिसांनी सासू आनंदी माने हिला ताब्यात घेतले आहे. बेडरुममध्ये रक्ताच्या थारोळ्यातील रियाचा मृतदेह ताब्यात घेतला असून शवविच्छेदनासाठी पाठवला आहे.

माने यांचं सदन कुंटुब आहे. मुलगा रोहन माने अमेरिकेला असतो. रोहनचे वडील स्वतः वन विभागात अधिकारी पदावर कार्यरत होते. सध्या रिटायर्ड झाले होते. सर्व काही व्यवस्थित सुरू होते. घटनेच्या दिवशी रियाचे सासरे आपल्या नातीला घेवून, बाहेर गेले होते. तर रियाचा छोटा दिर आणि त्याची पत्नी दुसऱ्या बेडरुममध्ये झोपले होते. डिसेंबरच्या अखेरपर्यंत रिया आणि रोहन हे पुन्हा आपल्या अमेरिकेला जाणार होते. आरोपी सासूला पोलिसांनी अटक केली असली तरी, घरचे असं कसं झालं याच दु:खात आहेत.