नवी दिल्ली, दि. ३० मे २०२०: देशाची राजधानी दिल्लीत पुन्हा एकदा भूकंपाचे धक्के जाणवले आहेत. दिल्लीव्यतिरिक्त अनेक राज्यांत भूकंपाचे धक्के जाणवले आहेत. यावेळी रिश्टर स्केलवर भूकंपाचे प्रमाण ४.६ झाले आहे.
गेल्या अनेक महिन्यांपासून काही दिवसांच्या अंतरावर दिल्ली-एनसीआरमध्ये भूकंपाचे धक्के जाणवले आहेत. कोरोना विषाणू आणि आता भूकंपांच्या या धक्यांमुळे लोकांच्या मनात भीतीचे वातावरण निर्माण झाले आहे. आता दिल्ली-एनसीआरसह पंजाब, हरियाणा आणि उत्तर प्रदेशच्या अनेक भागात भूकंपाचे धक्के जाणवले आहेत.
यावेळी भूकंपाचे केंद्रबिंदू हरियाणाच्या रोहतकमध्ये आहे. रात्री ९.०८ वाजता आलेल्या या भूकंपाचे धक्के सुमारे १० ते १५ सेकंदापर्यंत जाणवले. या भूकंपाची तीव्रता ४.६ इतकी नोंदविण्यात आली आहे. त्याच वेळी, भूकंपाच्या केंद्राची खोली पृष्ठभागाच्या आत पाच किलोमीटर अंतरावर असल्याचे सांगितली जात आहे. रोहतकमध्ये भूकंपाचे धक्के जाणवताच लोक घराबाहेर पडले तसेच काही भागातील इमारतींमधील घरांच्या काचा सुध्दा तुटल्या आहेत.
भूकंपच्या बाबतीत दिल्ली नेहमीच एक संवेदनशील क्षेत्र मानली जाते. भूगर्भशास्त्रज्ञांनी झोन -४ मध्ये दिल्ली आणि त्याच्या आसपासचे भाग ठेवले आहेत. देशाची राजधानी दिल्लीत भूकंपप्रवण भागात यमुना किनाऱ्याजवळील भागांचा समावेश आहे.
दिल्लीत बर्याच वेळा भूकंप
गेल्या काही दिवसांत देशाच्या राजधानीत भूकंपाचे धक्के बर्याच वेळा जाणवले. १५ मे रोजी दिल्लीमध्ये भूकंपाचे धक्के जाणवले. तथापि, रिश्टर स्केलवर भूकंपाची तीव्रता केवळ २.२ होती. यापूर्वी १० मे रोजी दुपारी १.४५ वाजेच्या सुमारास भूकंपाचे धक्के जाणवले. रिश्टर स्केलवर त्याची तीव्रता ३.५ असल्याचे सांगितले गेले.
एप्रिल महिन्यात दिल्लीमध्येही भूकंपाचे धक्के जाणवले. १२ आणि १३ एप्रिल रोजी दिल्लीमध्ये भूकंपाचे धक्के जाणवले. १२ एप्रिलला झालेल्या भूकंपाची तीव्रता ३.५ होती, तर १३ एप्रिलला झालेल्या भूकंपाची तीव्रता रिश्टर स्केलवर २.७ होती. दोन्ही भूकंपांच्या धक्क्यांचे केंद्र दिल्ली होते.
न्यूज अनकट प्रतिनिधी
