नाशिकमधील पोलिस भरतीच्या लेखी परीक्षेत ४५ टक्के उमेदवारांची दांडी

नाशिक, ३ एप्रिल २०२३: नाशिक ग्रामीण पोलिस दलातील रिक्त शिपाई पदाच्या लेखी परीक्षेसाठी झालेल्या लेखी परीक्षेत ४६ टक्के उमेदवार गैरहजर होते. लेखी परीक्षेसाठी १ हजार ८७९ पैकी ८४७ उमेदवारांनी लेखी परीक्षेला दांडी मारली. त्यामुळं आता उर्वरित १ हजार ३२ उमेदवारांच्या गुणांवर आधारित अंतिम निकाल जाहीर होणार आहे.

नाशिक ग्रामीणच्या १६४ रिक्त शिपाई पदांसाठी दि. २ ते २० जानेवारी या काळात मैदानी चाचणी पूर्ण झाली होती. त्यात ५० टक्के गुण मिळवलेल्या एका पदासाठी १० उमेदवारांची लेखी परीक्षेसाठी निवड झाली होती. त्यांची लेखी परीक्षा रविवारी घेण्यात आली. बुद्धीमत्ता, गणित, सामान्य ज्ञान, मराठीसह विषयांवर बहुपर्यायी स्वरूपातील १०० प्रश्न विचारण्यात आले होते.

उमेदवारांनी सकाळी ६.३० पासून परीक्षा केंद्रात गर्दी केली होती. ‘बायोमेट्रिक’ द्वारे उमेदवारांची ओळख पडताळून त्यांना परीक्षा केंद्रात प्रवेश देण्यात आला. खबरदारी म्हणून परीक्षा केंद्रात पोलिस बंदोबस्त तैनात होता. याआधी चालक पदासाठी घेतलेल्या मैदानी, लेखी व वाहन चालवण्याची परीक्षा यांचा निकाल जाहीर झालाय. त्यामुळं आता शिपाई पदाच्या लेखी परीक्षेचाही निकाल लवकरच जाहीर होईल व त्यानंतर अंतिम निकालाकडं सर्वांचं लक्ष लागून राहिलंय.

न्यूज अनकट प्रतिनिधी: अमोल बारवकर