सात वर्षाच्या मुलाने चालवले चक्क विमान, व्हिडिओ व्हायरल

पुणे, १६ ऑक्टोबर २०२२: काही तरी जगावेगळे किंवा अनोखी गोष्ट करण्याच्या नादात लोक काहीही करायला तयार होतात. विचित्र स्टंट आणि अचाट पराक्रम करण्याच्या अट्टाहासापायी सुरक्षा नियमांचे उल्लंघन देखील करतात. सध्या अशाच एका व्हिडिओची चर्चा सोशल मीडियात सुरु आहे. हा व्हिडिओ एका सात वर्षाच्या मुलाचा असून, हा मुलगा व्हिडिओत पायलटच्या सीटवर बसून चक्क विमान चालवताना दिसत आहे. या व्हिडिओमुळे सोशल मीडियावर चांगलीच खळबळ माजली आहे.

मुलगा रनवे वर चालवत आहे विमान

हा व्हिडिओ @Jitendray050691 या अकाउंटवरुन ट्विटरवर शेअर करण्यात आला आहे. यामध्ये सात वर्षाचा मुलगा पायलट सीटवर बसून रनवे वर विमान चालवताना दिसत आहे. हा व्हिडिओ पाहून हे सुरक्षा मानकांचे उल्लंघन असल्याचे म्हटले जात आहे. हा व्हिडिओ सूरतमधील असल्याचे बोलले जात आहे.

मुलाच्या शेजारी बसलेली व्यक्ती मुलाला विमान चालवण्याबाबत सूचना देत असल्याचे व्हिडिओत ऐकू येत आहे. मुलाला पायलट सीटवर बसवून विमान चालवण्यास देणे हे केवळ नियमांचे उल्लंघन नाही तर सुरक्षा मानकांच्या विरोधात आहे.

छंद पूर्ण करण्यासाठी नियमही धाब्यावर

हा व्हिडिओ सुरतमधील असून व्हिडिओतील हे विमान सिंगल इंजिन आहे. मुलाने एव्हिएशन हेडसेट घातला आहे आणि स्टीयरिंग व्हील धरलेला दिसत आहे. यावरुन हे स्पष्ट होते की, हे मूल फक्त फोटोग्राफीसाठी तिथे बसले नव्हते. मुलाचा छंद पूर्ण करण्यासाठी लोक नियमही धाब्यावर बसवताना दिसत आहेत.

न्यूज अनकट प्रतिनिधी : प्रज्ञा फाटक.