मुंबई, ११ जून २०२३ : अहमदनगर जिल्ह्यात संगमनेर तालुक्यातील समनापूर गावात मागील आठवड्यात दोन गटात वाद झाला. संगमनेरमध्ये हिंदुत्ववादी संघटनांनी मोर्चा काढला होता. या मोर्च्यानंतर घरी परतत असताना संगमनेर तालुक्यापासून पाच ते सहा किमी अंतरावर असलेल्या समनापूर गावात दोन गटात वाद झाल्याची घटना घडली होती. त्यानंतर कोल्हापूर शहरातील तरुणांच्या मोबाईलमध्ये औरंगजेब आणि टिपू सुलतान यांच्या फोटोचा स्टेटस ठेवल्याचा प्रकार समोर आला. यामुळे कोल्हापुरात तणाव निर्माण झाला होता. त्यानंतर आता नवी मुंबईत असाच प्रकार घडला आहे.
नवी मुंबईच्या वाशी सेक्टर १७ येथील एका खासगी ठिकाणी काम करणारा मोहम्मद हनिफ या समाजकंटकाने व्हाट्सअप स्टेटसवर औरंगजेबचे स्टेटस ठेवले. यामधून त्याने हिंदूंच्या धार्मिक भावना भडकावण्याचा प्रयत्न केला. औरंगजेबाचे उद्गातीकरण करण्याचा प्रयत्न केला, असा आरोप करत हिंदुत्वादी संघटना आक्रमक झाल्या आहेत. त्याचे हे स्टेटस नवी मुंबईत व्हायरल होताच नवी मुंबईतील सकल हिंदू समाजाने मध्यरात्री वाशी पोलीस स्टेशन येथे धाव घेत आरोपीवर गुन्हा दाखल करण्याची आणि आरोपीला अटक करण्याची मागणी केली.
मोहम्मद हनिफ या माथेफिरुला अटक करावी, नवी मुंबईत देखील पोलीस प्रशासन व सायबर पोलिसांनी अशा समाजकंटकांवर नजर ठेवून त्यांच्यावर कारवाई करावी, अन्यथा सकल हिंदू समाजाच्या वतीने आक्रोश आंदोलन करण्यात येईल. असा इशारा यावेळी देण्यात आला. त्यानंतर वाशी पोलिसांनी या तरुणाला ताब्यात घेतले.
न्यूज अनकट प्रतिनिधी – अनिल खळदकर
