पुण्यात आयटी पार्कमध्ये मोठी आग; कर्मचाऱ्यांची टेरेसवर धाव, अनेकजण अडकून, बचावकार्य सुरू

पुणे, २९ मे २०२३: कल्याणीनगर मधील मारीगोल्ड आयटी पार्कला आज सकाळी आग लागल्याची घटना घडली आहे. आगीमुळे आयटी पार्कमध्ये सकाळच्या शिप्टला काम करणाऱ्या कर्मचाऱ्यांपैकी काहीजण हे टेरेसवर पळाले होते. तर काही जण वरच्या मजल्यावर अडकले होते. अग्निशमन दलाला आगीची माहिती देण्यात आली.

यानंतर अग्निशमन दलाच्या चार गाड्या घटनास्थळी दाखल झाल्या आहेत. उंच इमारत असल्यामुळे उंच शिडीचा वापर करून चार कर्मचाऱ्यांना वाचवण्यात यश आलं आहे. तर अजून काही कर्मचारी घटनास्थळी अडकले आहेत. मिळालेल्या माहितीनुसार, आज सकाळी पुण्यातल्या मारीगोल्ड आयटी पार्कमध्ये स्फोट झाल्याची माहिती अग्निशमन दलाला मिळाली होती.

त्यानुसार अग्निशमन दलाच्या चार गाड्या घटनास्थळी रवाना झाल्या होत्या. मारीगोल्ड आयटी पार्कमध्ये काम करणारे कर्मचारी हे वरच्या मजल्यावर अडकले असल्याचं दृश्य दिसत होतं. जवानांनी उंच शिड्यांचा वापर करून आणि इमारतीच्या काचा फोडून अडकलेल्या काही कर्मचाऱ्यांची सुटका केली आहे. तर काही कर्मचारी टेरेसवर पळाले होते. त्यातील काही कर्मचाऱ्यांना वाचवण्यात यश आले आहे. तर बाकीच्या लोकांना वाचवण्यासाठी बचावकार्य सुरू आहे. असं अग्निशमन दलाच्या जवानांनी सांगितले आहे.

न्यूज अनकट प्रतिनिधी: अमोल बारवकर