सध्या सुरू असलेल्या पितृपंधरवड्यामुळे मोशी येथील श्री नागेश्वर महाराज उपबाजारात भाज्यांच्या दरात मोठी वाढ झाली आहे. विशेषतः गवार, मटार, लसूण आणि फ्लॉवर यांसारख्या भाज्यांचे भाव गगनाला भिडले आहेत, ज्यामुळे सर्वसामान्य ग्राहकांचे बजेट कोलमडले आहे.
बाजारातील ताज्या आकडेवारीनुसार, गवारचे दर ९० रुपयांवरून थेट २०० रुपये प्रति किलोवर पोहोचले आहेत, तर मटार १०० वरून १४० ते १६० रुपयांवर गेले आहेत. त्याचप्रमाणे, लसूण १२० ते १४० रुपये आणि फ्लॉवर ८० रुपये प्रति किलोने विकली जात आहे. मात्र, दिलासादायक बाब म्हणजे, दैनंदिन वापरातील टोमॅटोचे दर घसरल्याने नागरिकांना थोडा दिलासा मिळाला आहे.
बाजारपेठेतील आवक आणि दर
मोशीच्या उपबाजारात फळभाज्यांची ५,१३६ क्विंटल, पालेभाज्यांची ७१,३५० गड्ड्या आणि फळांची ५९४ क्विंटल आवक नोंदवली गेली. आवक भरपूर असूनही पितृपंधरवड्यात या भाज्यांना असलेली मोठी मागणी आणि सणाच्या निमित्ताने खरेदी वाढल्याने दरांमध्ये वाढ झाली आहे.
या वाढलेल्या दरांचा परिणाम गृहिणींच्या मासिक बजेटवर स्पष्टपणे दिसून येत आहे. कांदा २० रु, बटाटा २०-२५ रु, तर आले ८०-१०० रु अशा स्थिर दरांनी काही प्रमाणात दिलासा दिला असला तरी, अनेक महत्त्वाच्या भाज्यांचे भाव वाढल्याने कुटुंबांचे आर्थिक गणित बिघडले आहे. विशेषतः, सर्वसामान्यांसाठी आवश्यक असलेल्या भाज्यांचे दर वाढल्याने नाराजी व्यक्त केली जात आहे.
न्यूज अनकट प्रतिनिधी सोनाली तांबे
