एमपीएससी परीक्षेसाठी आमदार अभिमन्यू पवार यांनी घेतली उपमुख्यमंत्री देवेंद्र फडणवीस यांची भेट,जागा वाढवण्याची केली मागणी

पुणे, १५ जुलै २०२३ : महाराष्ट्र लोकसेवा आयोगाची परीक्षा देऊन शासन सेवेत जाण्याचे स्वप्न अनेक तरुण पाहत असतात. त्यासाठी पुणे शहरात अनेक तरुण तयारी करत आहेत. एमपीएससी परीक्षेच्या जाहिरातीची वाट पाहत असतात. त्यानंतर निकाल कधी येईल, त्याची वाट पाहतात. परंतु अनेक वेळा जाहिरात वेळेवर येत नाही, जाहिरात आली तर त्यात पुरेशा जागा नसतात, निकालास विलंब होत असतो, यामुळे परीक्षा देणारे तरुण, तरुणी यांच्यात नाराजी असते. आता या विद्यार्थ्यांच्या प्रश्नांसाठी आमदार अभिमन्यू पवार यांनी पुढाकर घेतला आहे.

आमदार अभिमन्यू पवार यांनी उपमुख्यमंत्री देवेंद्र फडणवीस यांची भेट घेतली. त्यांनी एमपीएससी विद्यार्थ्यांच्या प्रश्नांसाठी उपमुख्यमंत्र्यांची भेट घेतली. २०२३ च्या एमपीएससी जाहिरातीत पदांची वाढ करण्याचे पत्र त्यांनी देवेंद्र फडणवीस यांना दिले. या जाहिरातीत अवघ्या २९५ पदांची भरती होणार असल्याचे एमपीएससीने म्हटले आहे. परंतु एकूण ३१ संवर्गापैकी केवळ १४ संवर्गाची पदे यामध्ये आहेत. त्यामुळे २० संवर्गाची पदे यामध्ये समाविष्ट करून जागा वाढवण्याची मागणी आमदार अभिमन्यू पवार यांनी फडणवीस यांच्याकडे केली. देवेंद्र फडणवीस यांनी या मागणीचा सकारात्मक विचार करुन आढावा घेण्यात येणार असल्याचे त्यांना सांगितले.

एमपीएससी सिव्हील सर्व्हिस ग्रुप ए आणि बी साठी २९५ पदांची जाहिरात निघाली होती. एमपीएससी आर्किटेक्चरल इंजीनियरिंग सर्व्हिस ग्रुप ए आणि बी साठी १३० पदे भरली जाणार आहे. एमपीएससी इलेक्ट्रिकल इंजीनियरिंग सर्व्हिस ग्रुप बी साठी १५ पदे भरण्यात येणार आहेत. लीगल मेट्रोलॉजी इंस्पेक्टर म्हणून ३९ पदे भरली जाणार आहे. अन्न् व औषध प्रशासन विभागाची १९४ पदांसाठी जाहिरात निघाली होती.

न्यूज अनकट प्रतिनिधी : अनिल खळदकर