छत्तीसगड, 22 जून 2022: छत्तीसगड-ओडिशा सीमेवर सीआरपीएफ रोड ओपनिंग पार्टीवर नक्षलवाद्यांनी हल्ला केला असून, त्यात 3 जवान शहीद झाले आहेत. ओडिशातील नुआपाडा जिल्ह्यात सीआरपीएफ 19 बटालियनच्या आरओपी पार्टीवर हा हल्ला करण्यात आला. सूत्रांनी दिलेल्या माहितीनुसार, या हल्ल्यात अनेक जवान जखमीही झाले आहेत. नक्षलवाद्यांनी मृत जवानांकडून 3 AK-47 हिसकावून घटनास्थळावरून पळ काढला.
मिळालेल्या माहितीनुसार, मंगळवारी दुपारी 2.30 च्या सुमारास सीआरपीएफची टीम ओरिसातील नौपाडा जिल्ह्यात रस्ते बांधणीच्या सुरक्षेसाठी निघाली होती. पाऊस सुरू होताच तिघांनी ताडपत्रीखाली आधार घेतला. या नक्षलवाद्यांनी जवानांवर अंदाधुंद गोळीबार सुरू केला. नुआपाडा येथील बोडेन ब्लॉक अंतर्गत पाटधारा राखीव जंगलात हल्ला झाला, ज्यात तीन जवान शहीद झाले. ओडिशा सरकारने शहीद जवानांच्या कुटुंबीयांना 20 लाख रुपयांची भरपाई जाहीर केली आहे.
एएसआय शिशुपाल सिंग (उत्तर प्रदेश), एएसआय शिव लाल (हरियाणा) आणि कॉन्स्टेबल धर्मेंद्र कुमार सिंग (बिहार) अशी या हल्ल्यात शहीद झालेल्या जवानांची नावे आहेत. हल्ल्यानंतर सुरक्षा दलांनी नक्षलवाद्यांना चोख प्रत्युत्तर दिले, त्यानंतर माओवादी घटनास्थळावरून पळून गेले.
एसपी, नुआपाडा आणि सीआरपीएफचे वरिष्ठ अधिकारी घटनास्थळी पोहोचले आहेत. परिसरात कोम्बिंग ऑपरेशन तीव्र करण्यात आले आहे. कारवाईसाठी एसओजी आणि सीआरपीएफच्या आणखी तुकड्या तैनात करण्यात आल्या आहेत. माओवाद्यांचा खात्मा होईपर्यंत ही मोहीम सुरूच राहणार आहे.
विजापूरमध्येही चकमक सुरू
छत्तीसगडमधील विजापूरमध्ये पोलिस आणि नक्षलवाद्यांमध्ये चकमक सुरूच आहे. एएसपी पंकज शुक्ला यांनी सांगितले की, मिर्तूर पोलीस स्टेशन परिसरातील जंगलात नक्षलवादी आणि डीआरजी यांच्यात चकमक सुरू आहे.
एक दिवस आधी 20 जून रोजी मध्य प्रदेशातील बालाघाट जिल्ह्यात सुरक्षा दलांनी चकमकीत 3 नक्षलवाद्यांचा खात्मा केला होता. तिघांवरही एकूण ३० लाखांहून अधिक रुपयांचे बक्षीस जाहीर करण्यात आले होते. मारल्या गेलेल्या माओवाद्यांमध्ये एका महिलेचाही समावेश आहे.
राज्याची राजधानी भोपाळपासून 450 किमी अंतरावर असलेल्या बालाघाट जिल्ह्यातील बहेला पोलीस स्टेशन परिसरात ही चकमक झाली. येथील कडला गावाच्या जंगलात बालाघाट पोलीस हॉक फोर्स आणि नक्षलवादी यांच्यात झालेल्या चकमकीत विस्तारा दलम प्लाटून 56 आणि दादेकसा दलमचे 3 नक्षलवादी ठार झाले.
यापूर्वी छत्तीसगडमध्ये वर्षभरापूर्वी विजापूरमध्ये नक्षलवाद्यांनी सुरक्षा दलांवर घात केला होता. ज्यामध्ये 22 जवान शहीद झाले होते. त्यानंतर 200 ते 300 नक्षलवाद्यांनी जवानांवर हल्ला केला. नक्षलवादी कमांडर हिडमाला पकडण्यासाठी सुरक्षा दलाचे जवान गेले होते. मात्र घात लावून बसलेल्या नक्षलवाद्यांनी तीन बाजूंनी जवानांवर हल्ला केला. नक्षलवाद्यांनी गोळीबारही केला होता, रॉकेट लाँचरही सोडले होते आणि धारदार शस्त्रांनी हल्ला केला होता.
न्यूज अनकट प्रतिनिधी: ईश्वर वाघमारे
