पिंपरी-चिंचवड महापालिकेच्या बहुप्रतिक्षित आगामी निवडणुकीसाठी (Pimpri-Chinchwad Municipal Corporation Election) महत्त्वाचा टप्पा जाहीर झाला आहे. राज्य निवडणूक आयोगाने सोमवारी (दि. २७) प्रभाग रचनेतील आरक्षित जागांसाठीच्या सोडतीचा कार्यक्रम घोषित केला आहे. या आरक्षण सोडतीची प्रक्रिया ९, १० आणि ११ नोव्हेंबर या तीन दिवसांत पूर्ण करण्याचे आदेश महापालिकेच्या निवडणूक विभागाला देण्यात आले आहेत. यामुळे इच्छूक उमेदवार आणि माजी नगरसेवकांचे लक्ष या सोडतीकडे लागले आहे.
महापालिकेत एकूण ३२ प्रभाग असून, त्यांत १२८ सदस्यीय जागा आहेत. नवीन जनगणनेच्या आकडेवारीनुसार आणि सहा प्रभागांमध्ये झालेल्या बदलांमुळे अनुसूचित जाती (एससी), अनुसूचित जमाती (एसटी), इतर मागासवर्ग (ओबीसी) तसेच खुल्या गटातील महिलांच्या राखीव जागांच्या आरक्षणात बदल झाला आहे. आयोगाने ३० ऑक्टोबर ते ४ नोव्हेंबर या दरम्यान राखीव जागांची संख्या निश्चित करून मान्यता घेण्याचा कालावधी दिला आहे, तर ८ नोव्हेंबर रोजी सोडतीची जाहीर सूचना वृत्तपत्रांमध्ये प्रसिद्ध होईल. ११ नोव्हेंबरपर्यंत सोडतीचा अंतिम निकाल आयोगाला पाठवण्याचे निर्देश आहेत.
एकूण १२८ जागांपैकी एससीसाठी २० आणि एसटीसाठी ३ जागा राखीव आहेत. याव्यतिरिक्त, ओबीसी आणि खुल्या गटातील जागांवर प्रत्येकी ३५ जागा महिलांसाठी राखीव ठेवण्यात आल्या आहेत, ज्यामुळे एकूण ७० जागा महिलांसाठी आरक्षित आहेत. महापालिकेचे उपायुक्त सचिन पवार यांनी दिलेल्या माहितीनुसार, आयोगाच्या निर्देशानुसार विहित मुदतीत ही प्रक्रिया पारदर्शकपणे पार पाडण्यात येईल.
विशेष म्हणजे, यंदाच्या प्रक्रियेत हरकती व सूचना देखील स्वीकारल्या जातील, ज्यामुळे निवडणूक प्रक्रिया अधिक खुली आणि न्याय्य होणार आहे. ९, १०, आणि ११ नोव्हेंबरच्या सोडतीनंतर प्रभागनिहाय आरक्षणाचे चित्र स्पष्ट होईल.
न्यूज अनकट प्रतिनिधी: सोनाली तांबे
