‘महापालिका निवडणुकीसाठी ६ नोव्हेंबरला प्रारूप यादी प्रसिद्ध होणार २८ नोव्हेंबरला अंतिम यादी प्रकाशित’
महापालिका निवडणुकीसाठी (Pimpri-Chinchwad Municipal Corporation Election) प्रभागनिहाय मतदार याद्या (Ward-wise Voter List) तयार करण्याचे काम आता अंतिम टप्प्यात आले आहे. गेल्या आठवड्यात शहराच्या ३२ प्रभागांच्या सीमा निश्चित झाल्यानंतर आता या नवीन सीमांनुसार मतदार यादीचे विभाजन वेगाने सुरू आहे.
राज्य निवडणूक आयोगाच्या निर्देशानुसार, १ जुलै २०२५ रोजी प्रकाशित झालेल्या विधानसभा मतदार यादीचा आधार घेऊन ही प्रक्रिया काटेकोरपणे राबवली जात आहे. मतदारांची संख्या व नावे गहाळ होण्यासारखे पूर्वीचे गोंधळ टाळण्यासाठी यंदा विशेष काळजी घेतली जात आहे, अशी माहिती अधिकाऱ्यांनी दिली.
कार्यक्रमाची माहिती
- प्रारूप मतदार यादी प्रसिद्धी: ६ नोव्हेंबर रोजी प्रभागनिहाय प्रारूप मतदार यादी जाहीर केली जाईल आणि ती त्वरित महापालिकेच्या अधिकृत वेबसाइटवर अपलोड करण्यात येईल.
- हरकती व सूचनांची मुदत: नागरिकांना प्रारूप यादीतील त्रुटी किंवा बदल सुचवण्यासाठी १४ नोव्हेंबर पर्यंत मुदत असेल.
- अंतिम मतदार यादी प्रकाशन: प्राप्त हरकती व सूचनांचा विचार केल्यानंतर २८ नोव्हेंबर रोजी अंतिम मतदार यादी प्रकाशित केली जाईल.
सहायक आयुक्त अविनाश शिंदे यांनी दिलेल्या माहितीनुसार, पारदर्शकतेची मागणी पूर्ण करत ही प्रक्रिया वेगाने आणि काटेकोरपणे राबवण्यात येत आहे.
यानंतरच्या टप्प्यात मतदान केंद्रे आणि केंद्रनिहाय मतदार यादी तयार करण्याची प्रक्रिया सुरू होईल. महापालिका निवडणुकीच्या तयारीला वेग आला असून, शहरातील राजकीय वातावरण आता तापू लागले आहे.
न्यूज अनकट प्रतिनिधी सोनाली तांबे
