PCMC @50 initiative: पिंपरी-चिंचवड शहराच्या भविष्यातील विकासाची दिशा ठरवण्यासाठी आता महिला बचत गट सक्रिय झाले आहेत! महापालिकेच्या महत्त्वाकांक्षी ‘पीसीएमसी @ ५०’ शहर नियोजन धोरणांतर्गत शहरात एका व्यापक सर्वेक्षण उपक्रमाला सुरुवात होत आहे. या उपक्रमात शहरातील विविध स्वयं सहायता गटांतील तब्बल २५० हून अधिक महिला घरोघरी जाऊन शहरातील सुमारे वीस हजार नागरिकांशी थेट संवाद साधणार आहेत आणि त्यांच्या विकासाच्या अपेक्षा व सूचना जाणून घेणार आहेत.
शहराचे आयुक्त शेखर सिंह यांनी या महत्त्वपूर्ण उपक्रमाबद्दल बोलताना नागरिकांना उत्स्फूर्तपणे प्रतिसाद देण्याचे आवाहन केले आहे. ते म्हणाले, “शहराच्या पुढील ५० वर्षांच्या विकासाची योजना तयार करत असताना प्रत्येक नागरिकाचा विचार आणि मत आमच्यासाठी अत्यंत महत्त्वाचे आहे.
महिला बचत गटातील या समर्पित भगिनी घरोघरी जाऊन माहिती संकलित करणार आहेत. त्यांच्या या प्रयत्नांना नागरिकांनी सहकार्य करावे, जेणेकरून एक सर्वसमावेशक आणि शाश्वत विकास आराखडा तयार करता येईल.”
‘पीसीएमसी @ ५०’ अंतर्गत होणारे हे सर्वेक्षण शहराच्या सर्व स्तरांतील नागरिकांचे प्रतिनिधित्व सुनिश्चित करणार आहे.
यामध्ये शहरातील फेरीवाले, भाजीपाला विक्रेते, रिक्षाचालक, नोकरदार वर्ग, झोपडपट्ट्यांमधील कुटुंबे, गृहसंकुलातील रहिवासी, विविध सामाजिक संस्था, व्यावसायिक आस्थापना आणि शैक्षणिक संस्था अशा विविध घटकांचा समावेश असणार आहे. विशेष म्हणजे, हे सर्वेक्षण मे २०२५ च्या पहिल्या आठवड्यापासून सुरू होणार असून ते तीन आठवड्यांच्या कालावधीत पूर्ण करण्याचे नियोजन आहे.
या महत्त्वपूर्ण जबाबदारीसाठी महिला बचत गटांना योग्य प्रशिक्षण देण्यात आले आहे. नुकतेच पिंपरी येथील आचार्य अत्रे रंगमंदिरात टाटा स्ट्राईव्ह आणि महापालिकेच्या सिटी ट्रान्सफॉर्मेशन ऑफिस यांच्या संयुक्त विद्यमाने प्रशिक्षण कार्यक्रम आयोजित करण्यात आला होता. या प्रशिक्षणात महिलांना सर्वेक्षणाची पद्धत आणि नागरिकांशी संवाद साधण्याचे कौशल्ये शिकवण्यात आले. उपायुक्त विठ्ठल जोशी यांनी सांगितले की, “शहराच्या विकासासाठी नागरिकांचे प्रातिनिधिक मत जाणून घेणे आवश्यक आहे आणि प्रशिक्षित महिलांच्या माध्यमातून हे काम अधिक प्रभावीपणे होईल.”
महिला बचत गटांचा हा सक्रिय सहभाग आणि नागरिकांचा सकारात्मक प्रतिसाद निश्चितच पिंपरी-चिंचवड शहराच्या विकासाला एक नवी दिशा देईल, यात शंका नाही. आता शहरातील प्रत्येक नागरिकाच्या मताला महत्त्व मिळणार असून शहराच्या भविष्याची रूपरेखा अधिक लोकाभिमुख असणार आहे.
न्यूज अनकट प्रतिनिधी सोनाली तांबे
