Kondhva Kokulnagar: कोंढवा बुद्रुक येथे गुरुवारी दुपारी एक धक्कादायक घटना घडली. गोकुळनगरमधील एका ४० वर्षीय व्यक्तीने पाण्याच्या टाकीवर चढून स्थानिकांमध्ये खळबळ माजवली. ही परिस्थिती गंभीर होऊ शकली असती, मात्र पुणे अग्निशामन दल वेळेवर हजर राहिल्याने मोठा अनर्थ टळला.
ही घटना लक्ष्मीनगर लेन क्र. १० येथील भगवा चौकाजवळ दुपारी साडेबाराच्या सुमारास घडली. माहितीनुसार असे सांगितले जाते की, संबंधित व्यक्ती एका चार मजली इमारतीच्या पाण्याच्या टाकीवर चढला होता आणि लोखंडी रॉड व बांबू हातात घेत धोकादायक उंचीवर बसलेला होता.स्थानिकांनी त्याला खाली उतरवण्याचा प्रयत्न केला असता, तो आक्रमक झाला आणि जवळ येणाऱ्यांवर रॉड फिरवू लागला. “तो लोकांना धमकावत होता आणि कोणालाही जवळ येऊ देत नव्हता,” असे पुणे अग्निशमन दलाचे अधिकारी समीर शेख यांनी सांगितले.
अग्निशमन दलाच्या पथकाने तत्काळ घटनास्थळी धाव घेतली आणि जवळपास एक तासाच्या संयमाने त्या व्यक्तीला खाली उतरवण्यात यश मिळवले. या घटनेत कुणालाही इजा झाली नाही.तो खाली आल्यानंतर त्याला कोंढवा पोलिसांच्या ताब्यात देण्यात आले असून पोलीस या प्रकरणाचा तपास करत आहेत. त्याच्या अशा वागण्यामागचे कारण अद्याप स्पष्ट झालेले नाही.यावेळी अग्निशमन दलाच्या तत्पर आणि संवेदनशील कामगिरीचे कौतुक करण्यात आले.असे अधिकाऱ्यांनी सांगितले.
न्यूज अनकट प्रतिनिधी,प्रथमेश पाटणकर
