पुणे, ४ मार्च २०२५: पुणे शहरातील साधू वासवानी चौकात असलेल्या परमार चेंबर या व्यावसायिक इमारतीतील पार्किंगमध्ये एका बार मालकाने चक्क बार सुरू केल्याचा धक्कादायक प्रकार उघडकीस आला आहे. ‘निर्माण रेस्टॉरंट अँड फॅमिली बार’ असे या बारचे नाव असून, या बार मालकाने इमारतीच्या पार्किंगमध्ये पक्के बांधकाम करून बार थाटला आहे. विशेष म्हणजे, या बारपासून हाकेच्या अंतरावर उत्पादन शुल्क विभागाचे कार्यालय आहे. तरीही, या बारवर कोणतीही कारवाई करण्यात आलेली नाही.
नियम धाब्यावर, प्रशासनाची डोळेझाक
या बार मालकाने बार सुरू करण्यासाठी कोणत्याही शासकीय नियमांचे पालन केलेले नाही. इमारतीच्या पार्किंगमध्ये बार सुरू करण्यासाठी महापालिकेची परवानगी घेणे आवश्यक असते. तसेच, उत्पादन शुल्क विभागाचीही परवानगी आवश्यक असते. मात्र, या बार मालकाने यापैकी कोणतीही परवानगी घेतलेली नाही. या बारमुळे इमारतीत खरेदीसाठी येणाऱ्या नागरिकांना वाहने लावण्यास मोठी अडचण होत आहे.
शाळेपासून हाकेच्या अंतरावर बार
या बारच्या जवळच एक मुलींची शाळा आहे. नियमानुसार, शाळा किंवा धार्मिक स्थळांपासून १०० मीटर अंतरावर बारला परवानगी दिली जात नाही. मात्र, या बारपासून शाळा केवळ ३० मीटर अंतरावर आहे. त्यामुळे, या बारला परवानगी कशी मिळाली, असा प्रश्न उपस्थित होत आहे.
राजकीय वरदहस्त?
या बारला एका राजकीय नेत्याचा वरदहस्त असल्याचे बोलले जात आहे. त्यामुळे, प्रशासन या बारवर कारवाई करण्यास टाळाटाळ करत आहे, असा आरोप स्थानिकांनी केला आहे.
प्रशासनाची भूमिका
याबाबत उत्पादन शुल्क विभागाच्या अधिकाऱ्यांना विचारले असता, त्यांनी पार्किंगमध्ये बार सुरू करता येत नाही, असे सांगितले. तसेच, या प्रकरणाची चौकशी करून कारवाई करण्याचे आश्वासन दिले आहे.
स्थानिकांमध्ये संताप
या घटनेमुळे स्थानिकांमध्ये संतापाचे वातावरण आहे. प्रशासनाने या बारवर त्वरित कारवाई करावी, अशी मागणी स्थानिकांनी केली आहे.
न्यूज अनकट प्रतिनिधी – सोनाली तांबे
