पुणे २७ फेब्रुवारी २०२५: महापालिकेच्या ढिसाळ कारभाराचा फटका पुन्हा एकदा पुणेकरांना बसणार आहे. स्वतःच्या घरात राहणाऱ्यांना मिळकतकरात ४०% सवलत देण्याच्या योजनेत मोठा गोंधळ उडाला आहे. तब्बल ९७ हजार मिळकतधारकांचे अर्ज नोंदणीविना पडून आहेत. त्यामुळे या नागरिकांना या सवलतीपासून वंचित राहावे लागण्याची शक्यता आहे.
काय आहे प्रकरण?
राज्य सरकारने २०१९ पासून नवीन मिळकतींना ४०% सवलत रद्द केली होती. तसेच, आधीच्या सुमारे १ लाख मिळकतींची सवलतही काढून घेतली. नागरिकांच्या रोषानंतर शासनाने निर्णय बदलला आणि नवीन मिळकतींनाही सवलत देण्याचे आदेश दिले. मात्र, त्यासाठी ‘पीटी ३’ अर्ज भरणे आवश्यक केले.
अनेक नागरिकांनी मुदतवाढ देऊनही अर्ज भरले नाहीत. त्यामुळे महापालिकेच्या कर संकलन विभागाने घरोघरी जाऊन सर्वेक्षण करण्याचा निर्णय घेतला. ऑगस्ट २०२४ मध्ये ४ लाख ७४ हजार ११८ निवासी मिळकतींचे सर्वेक्षण करण्यात आले. त्यातील १ लाख ५७ हजार नागरिकांनी स्वतः राहत असल्याचे सांगितले. त्यांचे अर्जही भरून घेण्यात आले.
अर्जांची नोंदणीच रखडली!
सुरुवातीला ६५ हजार अर्जांची नोंदणी झाली. मात्र, उर्वरित ९७ हजार अर्जांची नोंदणी गेल्या सहा महिन्यांपासून रखडलेली आहे. प्रशासनाने आर्थिक वर्षाच्या मिळकतकर बिलांचे काम सुरू केले आहे. त्यामुळे, हे अर्ज नोंदणीकृत न झाल्यास नागरिकांना मोठा फटका बसणार आहे.
अतिरिक्त आयुक्तांचे स्पष्टीकरण
याबाबत पुणे महापालिकेचे अतिरिक्त आयुक्त पृथ्वीराज बी. पी. म्हणाले, “पीटी 3 अर्जांच्या नोंदणीला उशीर झाला आहे. त्यामुळे आगामी वर्षाची बिले तयार करण्यास विलंब होत आहे. मिळकतकर विभागाला अतिरिक्त मनुष्यबळ पुरवले जाईल. ज्यांनी अर्ज भरले आहेत, त्यांनाच ४०% सवलत मिळेल.”
नागरिकांमध्ये नाराजी
महापालिकेच्या या ढिसाळ कारभाराबद्दल नागरिकांमध्ये तीव्र नाराजी आहे. वेळेत नोंदणी न झाल्यास पुढील वर्षी सवलत कशी मिळणार, असा प्रश्न नागरिक विचारत आहेत.
पुणेकरांनो, सतर्क राहा!
तुमचा अर्ज नोंदणीकृत झाला आहे की नाही, याची खात्री करा. आवश्यक असल्यास महापालिका कार्यालयाशी संपर्क साधा.
न्यूज अनकट प्रतिनिधी – सोनाली तांबे
