सरदार वल्लभभाई पटेल यांची १४५ वी जयंती देशभरात ‘राष्ट्रीय एकता दिवस’ म्हणून साजरी

नवी दिल्ली , ३१ ऑक्टोबर २०२० : देशाचे पहिले गृहमंत्री लोहपुरुष सरदार वल्लभभाई पटेल यांची १४५ वी जयंती आज देशभरात ‘राष्ट्रीय एकता दिवस’ म्हणून साजरी होत आहे. आज सकाळी राष्ट्रपती रामनाथ कोविंद, उपराष्ट्रपती व्यंकैय्या नायडू, केंद्रीय गृहमंत्री अमित शाह आणि दिल्लीचे नायब राज्यपाल अनिल बैजल यांनी नवी दिल्लीतल्या सरदार पटेलांच्या पुतळ्यावर पुष्पांजली अर्पण करू सरदार अभिवादन केलं. यावेळी गृहमंत्री अमित शाह यांनी उपस्थितांना एकतेची शपथ दिली.

गुजरात दौऱ्यावर असलेल्या प्रधानमंत्री नरेंद्र मोदी यांनी केवाडिया इथे स्टॅच्यू ऑफ युनिटी’ वर जाऊन सरदार पटेल यांना अभिवादन केलं. लोह पुरुष वल्लभभाई पटेल हे देशाच्या अखंडतेचे आणि एकात्मतेचे शिल्पकार होते, असं प्रधानमंत्र्यानी आपल्या ट्विटर संदेशात म्हटलं आहे.

संरक्षणमंत्री राजनाथ सिंग यांनीही सरदार पटेल यांना अभिवादन केलं. देशाची एकता, अखंडता आणि सुरक्षा कायम राखण्यासाठी कटिबद्ध राहण्याचा पुनर्निर्धार करण्याची आवश्यकता असल्याचं त्यांनी म्हटलंय.
केंद्रीय माहिती आणि प्रसारण मंत्री प्रकाश जावडेकर यांनी देशवासियांना राष्ट्रीय एकता दिवसाच्या शुभेच्छा दिल्या आहेत. राष्ट्राच्या एकता आणि अखंडतेसाठी सरदार पटेल यांनी असीम त्याग केला असं ते म्हणाले.राष्ट्रपती रामनाथ कोविंद, उपराष्ट्रपती एम व्यंकय्या नायडू, केंद्रीय गृहमंत्री अमित शाह यांनीही नवी दिल्ली इथल्या पटेल चौकातल्या सरदार वल्लभभाई पटेल यांच्या प्रतिमेला पुष्पांजली अर्पण करीत अभिवादन केलं.

न्यूज अनकट प्रतिनिधी