गोंदियात पुण्यातील मुलाची विक्री, राजश्री सेन टोळीवर आणखी एक गुन्हा दाखल

नागपूर, ११ ऑगस्ट २०२३ : समाजसेवेच्या नावाखाली लहान मुलांच्या खरेदी-विक्रीचा व्यवसाय करणाऱ्या राजश्री सेन आणि तिच्या टोळीचा आणखी एक कारनामा पुढे आला आहे. या टोळीने पुण्यातील एका गरीब दाम्पत्याचे मूल घेऊन गोंदियातील एका व्यावसायिकाला विकले होते. याप्रकरणी सेनच्या टोळीतील सचिन पाटील, पिंकी उर्फ सुजाता लेंडे, पंकज कोल्हे, प्रिया पाटील आणि छाया मेश्राम यांच्याविरुद्ध पोलिसांनी गुन्हा दाखल केला आहे.

२७ डिसेंबर २०१९ रोजी सेनच्या टोळीने एका गरीब जोडप्याला पुण्याहून नागपूरला बोलावून घेतले. राजश्रीने जोडप्याला सांगितले होते की, माझ्या मित्राला मूल होत नाही, त्यामुळे एक मूल दत्तक घ्यायचे आहे. मूल दत्तक घेण्यासाठी बनावट कागदपत्रे तयार केली. यानंतर त्यांचे मूल गोंदियातील एका व्यावसायिकाला तीन लाख रुपयांना विकले. सेन आणि तीच्या टोळीने गोंदियामध्ये एका मुलाची विक्री केल्याची माहिती गुन्हे शाखेच्या मानवी तस्करीविरोधी युनिटला (एएचटीयू) मे महिन्यात मिळाली होती.

एएचटीयूने प्रकरणाचा तपास सुरू केला. तपासानंतर मुलाला विकत घेणारा व्यापारी सापडला. त्यांनी सांगितले की मी एक मूल दत्तक घेतले आहे. त्याला मुलाच्या आई- वडिलांची कोणतीही माहिती नव्हती. यानंतर पुण्यात मुलाच्या पालकांचा शोध सुरू करण्यात आला. पालकांची चौकशी केल्यानंतर संपूर्ण प्रकरण स्पष्ट झाले. एएचटीयूतर्फे राबविण्यात आलेल्या विशेष मोहिमेअंतर्गत आतापर्यंत १७ मुलांची विक्री करण्यात आली आहे.

श्वेता उर्फ आयशा खान आणि राजश्री सेन या आपापल्या टोळ्यांमार्फत शहरात लहान मुलांची विक्री करत होत्या. डीसीपी मुमक्का सुदर्शन यांच्या मार्गदर्शनाखाली एपीआय रेखा संकपाळ, सचिन बजबळकर, कॉन्स्टेबल सुनील वाकडे, ज्ञानेश्वर ढोके, दीपक बिंदाणे, मनीष पारये, आरती चव्हाण, अश्विनी खोडपेवार, ऋषिकेश डुंबरे, शरीफ शेख यांनी ही कारवाई केली.

न्यूज अनकट प्रतिनिधी : सूरज गायकवाड