धनुष्यबाण ना ठाकरेंचा ना शिंदेंचा, निवडणूक आयोगाकडून धनुष्यबाणावर बंदी

मुंबई, ९ ऑक्टोंबर २०२२: धनुष्यबाण चिन्ह कोणाचं यावरून शिवसेना आणि शिंदे गट यांच्या खडाजंगी पाहायला मिळाली. न्यायालयानंतर हा निर्णय निवडणूक आयोगाकडं गेला. आता निवडणूक आयोगाने धनुष्यबाण चिन्ह आणि शिवसेना हे पक्षाचं नाव दोन्ही गोठवलं आहे. ज्यानंतर आता प्रश्न उपस्थित होत आहेत की ३ नोव्हेंबर रोजी होणाऱ्या अंधेरी पूर्व येथील पोटनिवडणूक कोणत्या नावावर आणि निवडणूक चिन्हावर दोन्ही गट लढवणार? यावर रविवारी दोन्ही गट विचारमंथन करणार आहेत. आयोगाने दोन्ही गटांना १० ऑक्टोबरपर्यंत आपापल्या पक्षांसाठी तीन नावं आणि तीन निवडणूक चिन्हं देण्यास सांगितलं आहे. आयोग महाराष्ट्राचे मुख्य निवडणूक अधिकारी अर्थात सीईओ यांच्यामार्फत याचा निर्णय घेईल.

आयोगाने ८ ऑक्टोबर रोजी जारी केलेल्या आपल्या आदेशात दोन्ही गटांना ही सूट दिलीय की दोघेही त्यांच्या नावासोबत सेना हा शब्द वापरू शकतात. मात्र, आयोगाला प्राधान्याच्या आधारावर नाव आणि मुक्त चिन्हांपैकी तीन पर्याय द्यावे लागणार आहेत. अंधेरी पूर्व विधानसभा जागेवर होणाऱ्या पोटनिवडणुकीच्या पार्श्वभूमीवर आयोगाने दोन्ही गटांकडून शिवसेनेच्या मूळ नावाशी मिळतीजुळती किंवा स्वत:साठी योग्य अशी नावं मागवली आहेत. यासोबतच अपक्ष उमेदवारांसाठी मुक्त चिन्हांपैकी तीन चिन्हांची यादी प्राधान्याने मागविण्यात आलीय. आयोग इतर कोणत्याही उमेदवाराला किंवा प्रादेशिक पक्षाला दिलेल्या चिन्हांपैकी प्राधान्याच्या आधारावर चिन्हाचं वाटप करेल. पक्षाच्या झेंड्याबाबतही तेच धोरण राहील.

पोटनिवडणुकीनंतर शिवसेनेबाबत निर्णय?

पोटनिवडणूक पार पडल्यानंतर आयोग आपल्या नियमानुसार शिवसेनेच्या मूळ नाव आणि चिन्हावरील दाव्याची सुनावणी सुरू ठेवणार असल्याचं सांगण्यात येत आहे. आयोगाच्या उच्चपदस्थ सूत्रांनी दिलेल्या माहितीनुसार, दाव्यांची चौकशी करण्यासाठी वेळ आणि संसाधने लागतात. त्यामुळं आयोग त्यात घाई करत नाही. पूर्ण समाधान झाल्यानंतरच ऑर्डर येईल. मात्र, यापूर्वीही पक्षांतर्गत मतभेद, वाद, बंडखोरी झालीय. त्यानंतरही नावे व गुणांबाबत प्रति दावा केला जात होता. त्यानंतरही आयोगाने आधी मूळ पक्षाचे नाव, चिन्ह आणि झेंडा गोठवला होता. अलीकडं लोक जनशक्ती पक्ष आणि त्याआधी जनता दल आणि अण्णाद्रमुक यांच्यात असेच वाद झाले, तेव्हा आयोगानेही हेच धोरण अवलंबलं.

दोन्ही गटांच्या नेत्यांची बैठक

निवडणूक आयोगाने शिवसेनेच्या चिन्हावर बंदी घातल्यानंतर दोन्ही गटात खळबळ उडालीय. यासंदर्भात उद्धव ठाकरे रविवारी ९ ऑक्टोबर रोजी दुपारी १२ वाजता मातोश्रीवर आपल्या नेत्यांची बैठक घेणार आहेत. त्याचवेळी एकनाथ शिंदे आपल्या गटातील मंत्री आणि खासदारांची वर्षा बंगल्यावर सायंकाळी ७ वाजता बैठक घेणार आहेत. दोन्ही गटात पुढील रणनीती तयार करण्याबरोबरच नवीन नाव आणि चिन्हावरही चर्चा होणार असल्याचे सांगण्यात येत आहे.

न्यूज अनकट प्रतिनिधी: ईश्वर वाघमारे