जालना शहरातील नवीन मोंढा परिसरात ६ लाखांची बॅग हिसकावून चोरट्यांचा पोबारा

जालना ३० डिसेंबर २०२३ : जालना शहरातील नवीन मोंढा परिसरात एका व्यापाऱ्याची ६ लाखांची रक्कम असलेली बॅग हिसकावून चोरांनी पुन्हा आपली दहशत पसरवली आहे. यामुळे परिसरात खळबळ माजली आहे.

घटनेची हकीकत अशी की, जालना येथील व्यापारी अभय छाजेड यांचा मुलगा हा नवीन मोंढ्यात असलेल्या किराणा दुकानात जात होता. तो मोंढा परिसरात आला असताना दुचाकी वरून आलेल्या दोघांनी त्याची पैसे ठेवसलेली बॅग हिसकावून धूम ठोकली आहे. या घटनेनंतर त्यांनी आरडाओरडा केल्याने लोकांच्या हा प्रकार लक्षात आला, तो पर्यंत बॅगसह आतील ६ लाख रुपये घेऊन चोरटे फरार झाले. पोलिसांनी या घटनेची माहिती मिळताच घटनास्थळी पोहचत पंचानामा केला असून चंदनझिरा पोलिसात गुन्हा दाखल झाला आहे.

या घटनेमुळे व्यापारी वर्गात एकच दहशत पसरली असून चोरट्यानी व्यापाऱ्यांना टार्गेट केले की काय अशी भीती पसरली आहे. पोलिसांचा वचक राहिला आहे की नाही, असा सवाल उपस्थित होत आहे. सदर घटनेची माहिती मिळताच सदर बाजार पोलीस ठाण्याचे पोलिस निरीक्षक प्रशांत महाजन व त्यांचे पथक तसेच स्थानिक गुन्हे शाखेचे पथक यांनी तात्काळ घटनास्थळी धाव घेऊन, या घटनेतील चोरांचा तपास करण्यासाठी दोन पथक रवाना केले आहेत.

न्यूज अनकट प्रतिनिधी : विजय साळी