राजू श्रीवास्तव यांचे राजकारणातील अपूर्ण काम पूर्ण करण्यासाठी त्यांची पत्नी राजकारणात सहभागी होणार?

मुंबई, २६ डिसेंबर २०२२ : २०२२ या वर्षात अनेक मनोरंजन विश्वातील कलाकारांनी जगाचा निरोप घेतला. टीव्ही मनोरंजन विश्वातील प्रसिद्ध सेलिब्रिटी आणि कॉमेडियन राजू श्रीवास्तव यांचे काही महिन्यांपूर्वीच निधन झाले. संपूर्ण जगाला प्रचंड हसविणाऱ्या या कलाकाराच्या आठवणी, किस्से, विनोद, स्टॅंडअप आपल्यासोबत आजही आहेत. त्यांच्या अचानक निधनाने चाहत्यांसह त्यांच्या घरच्यांनाही मोठा धक्का बसला होता; परंतु आता त्यांच्या अपूर्ण राहिलेल्या इच्छा पूर्ण करण्यासाठी त्यांच्या घरच्यांनी पुढचे पाऊल टाकण्याचा निर्णय घेतला आहे.

एका मुलाखतीत राजू यांच्या पत्नीने राजू श्रीवास्तव यांची एक अर्धवट राहिलेली इच्छा बोलून दाखविली. त्या म्हणाल्या, ”राजू श्रीवास्तव यांना राजकारणात खूप रस होता. तशी त्यांनी सुरवातही केली होती; परंतु त्यांचे ते काम अर्धवट राहिले. त्यामुळे मला जर संधी मिळाली तर मी त्यांचे स्वप्न पूर्ण करीन.” ते कलाकार होते आणि त्यांचा वारसा आमची दोन्ही मुले पुढे चालवीत आहेत. मुलगी अंतरा एका प्रॉडक्शन हाऊसमध्ये काम करते. तर मुलगा आयुष्मान सीतारवादनात पुढे जात आहे, असेही त्यांनी सांगितले.

राजू श्रीवास्तव भाजप पक्षात प्रवेश करून राजकारणात सक्रिय झाले. एवढेच नाही, तर मोदी यांच्या ‘स्वच्छ भारत अभियाना’चे ते ब्रँड ॲम्बेसिडर झाले असून, चित्रपट विकास मंडळाचेही ते अध्यक्ष झाले होते. मनोरंजन क्षेत्राप्रमाणेच या क्षेत्रातही त्यांना बरेच काम करायचे होते; पण त्यांच्या निधनाने त्यांचे हे स्वप्न अपूर्ण राहिले, असे त्यांच्या पत्नीने सांगितले. तर दुःखातून सावरून आता त्यांची अपूर्ण राहिलेली स्वप्ने पूर्ण करण्याची इच्छा त्यांनी बोलून दाखविली.

न्यूज अनकट प्रतिनिधी : ऋतुजा पंढरपुरे