सर्वात मोठा बँकिंग घोटाळा! ABG शिपयार्डवर FIR, 22,842 कोटींची 28 बँकांची फसवणूक

नवी दिल्ली, 14 फेब्रुवारी 2022: बँकिंग फसवणूक प्रकरणी सीबीआयने एबीजी शिपयार्ड लिमिटेड आणि तिचे तत्कालीन अध्यक्ष आणि व्यवस्थापकीय संचालक आणि व्यवस्थापकीय संचालक ऋषी कमलेश अग्रवाल आणि इतरांविरुद्ध फसवणुकीचा गुन्हा दाखल केला आहे. स्टेट बँक ऑफ इंडिया (SBI) च्या नेतृत्वाखालील 28 बँकांच्या संघासह 22,842 कोटी रुपयांच्या कथित फसवणुकीच्या संदर्भात एफआयआर नोंदवण्यात आला आहे. सीबीआयने आतापर्यंत नोंदवलेल्या बँकिंग फसवणुकीच्या प्रकरणांपैकी हे सर्वात मोठे प्रकरण आहे.

या लोकांवरही गुन्हा दाखल

अग्रवाल व्यतिरिक्त, एजन्सीने तत्कालीन कार्यकारी संचालक संथनम मुथुस्वामी, संचालक अश्विनी कुमार, सुशील कुमार अग्रवाल आणि रवी विमल नेवेटिया आणि आणखी एक कंपनी एबीजी इंटरनॅशनल प्रायव्हेट लिमिटेड यांच्याविरुद्ध देखील गुन्हा दाखल केला आहे. त्यांच्याविरुद्ध गुन्हेगारी कट रचणे, फसवणूक करणे, विश्वासघात करणे आणि पदाचा गैरवापर केल्याप्रकरणी गुन्हा दाखल करण्यात आला आहे.

जाणून घ्या कधी सुरू झाले हे प्रकरण

8 नोव्हेंबर 2019 रोजी बँकेने पहिली तक्रार दाखल केली होती. यावर सीबीआयने 12 मार्च 2020 रोजी काही स्पष्टीकरण मागवले होते. त्यानंतर बँकेने त्याच वर्षी ऑगस्टमध्ये नवीन तक्रार दाखल केली. सुमारे दीड वर्ष तपास केल्यानंतर सीबीआयने तक्रारीवर कारवाई करत 7 फेब्रुवारी 2022 रोजी तक्रार दाखल केली.

कंपनीने 28 बँका आणि वित्तीय संस्थांकडून कर्ज घेतले आहे आणि SBI कडे सुमारे 2,468.51 कोटी रुपयांचे एक्सपोजर आहे. फॉरेन्सिंग ऑडिटमध्ये असे उघड झाले आहे की 2012-17 दरम्यान, आरोपींनी एकमेकांच्या संगनमताने निधी वळवणे, अनियमितता आणि विश्वास भंग यांसारख्या बेकायदेशीर कृत्ये केली. एफआयआरमध्ये असे म्हटले आहे की, बँकांनी ज्या उद्देशासाठी निधी जारी केला होता त्याऐवजी ते अन्य काही कारणांसाठी वापरले गेले.

जाणून घ्या कंपनीबद्दल

एबीजी शिपयार्ड लिमिटेड ही खाजगी क्षेत्रातील जहाज बांधणी कंपनी आहे. कंपनी बल्क कॅरियर्स, डेक बार्जेस, इंटरसेप्टर, बोट्स, अँकर हँडलिंग सप्लाय शिप, टग्स आणि ऑफशोर व्हेसल्स बनवते. कंपनी भारतात व्यावसायिक आणि सरकारी ग्राहकांना सेवा देते. या कंपनीचे शिपयार्ड गुजरातमधील दहेज आणि सुरत येथे आहेत.

न्यूज अनकट प्रतिनिधी: ईश्वर वाघमारे