महाराष्ट्र गद्दारांची भूमी नाही; पाकिस्तानही सांगेल खरी शिवसेना कोणाची, उद्धव ठाकरेंचा मुख्यमंत्री शिंदेंवर हल्लाबोल

जळगाव, २४ एप्रिल २०२३: खरी शिवसेना कोण यावरून उद्धव गट आणि शिंदे गटात संघर्ष सुरूच आहे. रविवारी जळगावातील सभेला संबोधित करताना शिवसेना पक्षप्रमुख उद्धव ठाकरे यांनी एकनाथ शिंदे यांच्यावर सडकून टीका केली. ते म्हणाले की, इथे जे प्रेम दिसत आहे ते पाहून पाकिस्तानही खरी शिवसेना कोणाची हे सांगेल, पण निवडणूक आयोग तसा विचार करत नाही.

शिंदे गटावर निशाणा साधत उद्धव ठाकरे म्हणाले की, काही लोकांनी आमचा विश्वासघात केला. आमच्या तिकिटावर निवडणूक लढवली आणि मग गद्दारी करून दुसरीकडे निघून गेले. मात्र जनता त्यांच्यासोबत आहे. उद्धव ठाकरे म्हणाले की, महाराष्ट्र ही देशद्रोह्यांची नाही तर शूरांची भूमी आहे. शिंदे आणि फडणवीस यांचे सरकार लवकरच पडणार आहे. एकनाथ शिंदे यांच्या बंडखोरीमुळे गेल्या वर्षी जूनमध्ये उद्धव यांच्या नेतृत्वाखालील एमव्हीए सरकार पडले. आयोगाने शिंदे गटाला ‘शिवसेना’ हे नाव आणि पक्षाचे निवडणूक चिन्ह ‘धनुष्यबाण’ दिले होते.

उद्धव ठाकरे म्हणाले की, भाजपच्या लोकांना हिंदुत्वाची व्याख्या समजत नाही. त्यांनी शिंदे गट आणि भाजपला महाराष्ट्रात निवडणुका घेण्याचे आव्हान दिले. दुसरीकडे एकनाथ शिंदे यांनी उद्धव यांच्या पाकिस्तानबद्दलच्या वक्तव्यावर हल्लाबोल करताना म्हटले की, खरी शिवसेना कोणाची हे ठरवण्यासाठी पाकिस्तानच्या प्रमाणपत्राची गरज नाही. कोणी असे म्हणणे दुर्दैवी आहे.

‘न्यूज अनकट’ प्रतिनिधी : सूरज गायकवाड