शाहरुख खानच्या ‘जवान’ने रिलीजपूर्वी रचला इतिहास, जगातील सर्वात मोठ्या पडद्यावर होणार स्क्रिनिंग

मुंबई, २६ ऑगस्ट २०२३ : बॉलिवूड अभिनेता शाहरुख खानचा आगामी चित्रपट ‘जवान’ पाहण्याची चाहत्यांमध्ये जबरदस्त क्रेझ आहे. आता हा चित्रपट प्रदर्शित होण्यापूर्वीच इतिहास रचणार आहे. शाहरुख खानचा चित्रपट असे काही करणार आहे जे आजपर्यंत कोणत्याही भारतीय चित्रपटाने केले नाही. वास्तविक, ‘जवान’ चित्रपटाचे स्क्रिनिंग जगातील सर्वात मोठ्या पडद्यावर होणार आहे.

‘जवान’ हा चित्रपट जर्मनीतील लिओनबर्ग येथे असलेल्या ट्रम्पलास्ट या मोठ्या IMAX सिनेमागृहात प्रदर्शित होणार आहे. ट्रम्पलास्टच्या स्क्रीनचा आकार १२५ फूट रुंद आणि ७२ फूट उंच आहे. ट्रम्पलास्टवर ‘जवान’ रिलीज झाल्यानंतर हा चित्रपट जगातील सर्वात मोठ्या स्क्रीनवर प्रदर्शित होणारा पहिला भारतीय चित्रपट ठरणार आहे.

विशेष म्हणजे एटली दिग्दर्शित ‘जवान’ या चित्रपटात शाहरुख खानसोबत नयनतारा आणि विजय सेतुपती देखील मुख्य भूमिकेत दिसणार आहेत. याशिवाय सान्या मल्होत्रा, प्रियामणी आणि सुनील ग्रोव्हर देखील या चित्रपटात दिसणार आहेत. या चित्रपटात दीपिका पदुकोण, थलपथी विजय आणि संजय दत्त विशेष भूमिकेत दिसणार आहेत. ‘जवान’ हा चित्रपट ७ सप्टेंबरला चित्रपटगृहात प्रदर्शित होणार आहे.

न्यूज अनकट प्रतिनिधी : सूरज गायकवाड